आरंभ मराठी / धाराशिव
महाराष्ट्र विधान परिषदेच्या शिक्षक आणि पदवीधर मतदारसंघातील पाच जागांसाठी निवडणूक कार्यक्रम जाहीर झाला असून, २३ ऑक्टोबर २०२६ रोजी मतदान होणार आहे. औरंगाबाद (छत्रपती संभाजीनगर), पुणे आणि नागपूर या तीन विभागीय पदवीधर मतदारसंघांसह अमरावती आणि पुणे विभागीय शिक्षक मतदारसंघासाठी ही निवडणूक होणार आहे. निवडणुकीची अधिसूचना २९ सप्टेंबर रोजी जारी होणार असून, २७ ऑक्टोबरला मतमोजणी करून निकाल जाहीर केला जाणार आहे. निवडणूक कार्यक्रमानुसार ६ ऑक्टोबर ही उमेदवारी अर्ज दाखल करण्याची अंतिम तारीख आहे.
७ ऑक्टोबर रोजी अर्जांची छाननी केली जाणार असून, ९ ऑक्टोबरपर्यंत उमेदवारांना उमेदवारी अर्ज मागे घेता येणार आहे. त्यानंतर २३ ऑक्टोबरला मतदान होईल आणि २७ ऑक्टोबरला मतमोजणी व निकाल जाहीर केला जाणार आहे.
या निवडणुकीमुळे राज्यातील राजकीय वातावरण पुन्हा तापण्याची शक्यता आहे. विशेषतः छत्रपती संभाजीनगर विभाग पदवीधर मतदारसंघातील निवडणुकीकडे राजकीय वर्तुळाचे लक्ष लागले आहे. या मतदारसंघाच्या निवडणुकीसाठी मतदार यादीची प्रक्रिया यापूर्वीच सुरू झाली असून, जिल्हा प्रशासनाच्या अधिकृत संकेतस्थळावर ०५-औरंगाबाद विभाग पदवीधर मतदारसंघाची अंतिम मतदार यादी आणि मतदार नोंदणीसंदर्भातील माहिती उपलब्ध करण्यात आली आहे.
छत्रपती संभाजीनगर विभाग पदवीधर मतदारसंघाच्या मागील निवडणुकांच्या पार्श्वभूमीवर यंदाची निवडणूक विशेष महत्त्वाची मानली जात आहे.
मागील तीन टर्ममध्ये राष्ट्रवादी काँग्रेस पक्षाचा उमेदवार या मतदारसंघातून विजयी झाला आहे. राष्ट्रवादी काँग्रेसमध्ये दोन स्वतंत्र गट निर्माण झाल्यानंतर होणारी ही महत्त्वाची निवडणूक आहे. त्यामुळे या मतदारसंघात राष्ट्रवादीच्या दोन्ही गटांची भूमिका, उमेदवार निवड आणि मतदारांपर्यंत पोहोचण्याची रणनीती याकडे लक्ष लागले आहे.
दरम्यान, भाजपकडून ही निवडणूक स्वबळावर लढण्याची शक्यता व्यक्त केली जात आहे.
महायुतीतील जागावाटप आणि उमेदवार निवडीबाबत अंतिम निर्णय झाल्यानंतर या मतदारसंघातील राजकीय समीकरण अधिक स्पष्ट होणार आहे. दुसरीकडे महाविकास आघाडीकडून कोणत्या पक्षाचा उमेदवार मैदानात उतरतो, यावरही निवडणुकीचे स्वरूप अवलंबून राहणार आहे. सध्या विविध पक्षांकडून संभाव्य उमेदवारांची चाचपणी सुरू असून, इच्छुकांनीही पक्षश्रेष्ठींकडे मोर्चेबांधणी सुरू केली आहे.
निवडणूक कार्यक्रम –
अधिसूचना जारी : २९ सप्टेंबर २०२६
उमेदवारी अर्ज दाखल करण्याची अंतिम तारीख : ६ ऑक्टोबर २०२६
अर्जांची छाननी : ७ ऑक्टोबर २०२६
उमेदवारी अर्ज मागे घेण्याची अंतिम तारीख : ९ ऑक्टोबर २०२६
मतदान : २३ ऑक्टोबर २०२६
मतमोजणी व निकाल : २७ ऑक्टोबर २०२६
