आरंभ मराठी / धाराशिव
धाराशिव जिल्ह्यात निर्माण झालेल्या भीषण दुष्काळी परिस्थितीची प्रत्यक्ष पाहणी करण्यासाठी मुख्यमंत्री देवेंद्र फडणवीस बुधवारी (दि. २३ सप्टेंबर) धाराशिव जिल्ह्याच्या दौऱ्यावर येत आहेत. जिल्ह्यात यंदा पावसाची मोठी तूट निर्माण झाली असून, पावसाअभावी सुमारे साडेपाच लाख हेक्टर क्षेत्रावरील खरीप पिके संकटात आली आहेत.
चारा व पाणीटंचाईची परिस्थितीही गंभीर बनत चालली आहे. या पार्श्वभूमीवर मुख्यमंत्र्यांचा हा दौरा शेतकरी आणि जिल्हावासीयांच्या दृष्टीने महत्त्वपूर्ण ठरणार आहे.
यंदाच्या खरीप हंगामात सुरुवातीला झालेल्या पावसानंतर पावसाने मोठी उघडीप दिल्याने जिल्ह्यातील अनेक भागांमध्ये पिकांची अवस्था बिकट झाली आहे. सोयाबीन, तूर, मूग, उडीद यांसह विविध खरीप पिकांवर अवर्षणाचा मोठा परिणाम झाला आहे. पावसाअभावी पिकांची वाढ खुंटली असून अनेक ठिकाणी पिके करपण्याच्या अवस्थेत आहेत. जिल्ह्यात पावसाची तूट ५० टक्क्यांवर गेल्याने ग्रामीण अर्थव्यवस्थेवरही त्याचा गंभीर परिणाम होण्याची शक्यता निर्माण झाली आहे.
मागील वर्षी अतिवृष्टीमुळे पिकांचे मोठे नुकसान झाल्यानंतर यंदा अवर्षणाच्या संकटाने शेतकरी अक्षरशः पिचून निघाला आहे. खरीप हंगामातील उत्पादनावर मोठा परिणाम होण्याची शक्यता असल्याने शेतकऱ्यांना तातडीने आर्थिक मदत मिळावी, अशी मागणी विविध राजकीय पक्ष, शेतकरी संघटना आणि लोकप्रतिनिधींकडून केली जात आहे. मुख्यमंत्री फडणवीस यांच्या दौऱ्यात धाराशिव, वाशी, कळंब आणि तुळजापूर तालुक्यांतील काही गावांना भेट देऊन तेथील दुष्काळी परिस्थितीची प्रत्यक्ष पाहणी करणार आहेत.
तसेच दुष्काळग्रस्त शेतकऱ्यांशी संवाद साधून त्यांच्या समस्या जाणून घेणार आहेत. पिकांची झालेली हानी, पाणीटंचाई, जनावरांसाठी चाऱ्याची उपलब्धता आणि शासनाकडून अपेक्षित मदत याबाबत शेतकरी मुख्यमंत्र्यांसमोर आपली व्यथा मांडणार आहेत.
दुष्काळाच्या पार्श्वभूमीवर शेतकऱ्यांना हेक्टरी ५० हजार रुपयांची तातडीने आर्थिक मदत द्यावी, अशी मागणी विरोधकांकडून करण्यात येत आहे. त्याचबरोबर पीकविमा, दुष्काळी अनुदान, चारा डेपो, टँकरने पाणीपुरवठा आणि रोजगार हमीच्या कामांना गती देण्याची मागणीही होत आहे.
त्यामुळे मुख्यमंत्री जिल्हा दौऱ्यात शेतकऱ्यांसाठी कोणत्या उपाययोजना जाहीर करतात, याकडे सर्वांचे लक्ष लागले आहे.
दरम्यान, दुष्काळी परिस्थितीच्या पार्श्वभूमीवर आज होणाऱ्या राज्य मंत्रिमंडळाच्या बैठकीत महत्त्वाचे निर्णय होण्याची शक्यता व्यक्त केली जात आहे. मुख्यमंत्री फडणवीस हे धाराशिवसह लातूर जिल्ह्यालाही भेट देणार आहेत. मराठवाड्यातील दुष्काळी परिस्थितीचा प्रत्यक्ष आढावा घेऊन शेतकऱ्यांना दिलासा देण्यासाठी शासन कोणते निर्णय घेते, याकडे संपूर्ण विभागाचे लक्ष लागले आहे. त्यामुळे मुख्यमंत्र्यांच्या उद्याच्या दौऱ्यातील पाहणी आणि शेतकऱ्यांशी होणारा संवाद याला विशेष महत्त्व प्राप्त झाले आहे.
