आरंभ मराठी / धाराशिव
विधान परिषदेच्या औरंगाबाद विभाग पदवीधर मतदारसंघाच्या निवडणुकीत राष्ट्रवादी काँग्रेस पक्ष – शरदचंद्र पवार पक्षाचे उमेदवार डॉ. प्रतापसिंह वेदप्रकाश पाटील यांना अखेर ४५ तासांच्या मतमोजणीनंतर पहाटे पाच वाजता विजयी घोषित करण्यात आले. डॉ पाटील यांनी १८ हजार १२४ मतांच्या फरकाने विजय मिळविला. डॉ. पाटील यांना ८५ हजार ८७६ मते मिळाली, तर राष्ट्रवादी काँग्रेस पक्षाचे उमेदवार सतीश भानुदासराव चव्हाण यांना ६७ हजार ७५२ मते मिळाली. गुरुवारी (दि. २९) पहाटे ५ वाजून १० मिनिटांनी निवडणूक निर्णय अधिकारी तथा विभागीय आयुक्त जी.
श्रीकांत यांनी डॉ. पाटील यांना विजयी घोषित करून विजयाचे प्रमाणपत्र प्रदान केले. छत्रपती संभाजीनगर येथील चिकलठाणा एमआयडीसी परिसरातील रेसोनेट लॉजिस्टिक्स एलएलपी येथे मतमोजणी पार पडली. छत्रपती संभाजीनगर, जालना, बीड, परभणी, हिंगोली, नांदेड, लातूर आणि धाराशिव या आठ जिल्ह्यांतील ८४२ मतदान केंद्रांवर ही निवडणूक झाली. एकूण ४१ उमेदवार रिंगणात होते. मतमोजणीसाठी ७० टेबलांची व्यवस्था करण्यात आली होती.
मतमोजणीच्या प्रारंभी मतपत्रिकांची पडताळणी व वर्गीकरण करण्यात आले. त्यानंतर पहिल्या पसंतीच्या मतांची मोजणी तीन फेऱ्यांत पूर्ण झाली.
एकूण १ लाख ७७ हजार ११५ मते वैध, तर १६ हजार ५४० मते अवैध ठरली. वैध मतांच्या आधारे विजयासाठी ८८ हजार ५५८ मतांचा कोटा निश्चित करण्यात आला.
पहिल्या पसंतीच्या मतमोजणीत डॉ. प्रतापसिंह पाटील यांना ७३ हजार ९३१, सतीश चव्हाण यांना ६० हजार ७६८, अपक्ष उमेदवार रविराज उर्फ अण्णासाहेब साबळे-पाटील यांना १९ हजार ८३५, तर दिलीप घुगे यांना ८ हजार ४३९ मते मिळाली. मात्र, कोणत्याही उमेदवाराला विजयासाठी आवश्यक असलेला मतांचा कोटा पूर्ण करता आला नाही. विजयाचा कोटा पूर्ण न झाल्याने निवडणूक नियमांनुसार सर्वांत कमी मते मिळालेल्या उमेदवारांना टप्प्याटप्प्याने वगळून त्यांच्या मतपत्रिकांवरील पुढील उपलब्ध पसंतीक्रमानुसार मतहस्तांतरणाची प्रक्रिया राबविण्यात आली.
दिलीप घुगे यांच्या मतपत्रिकांमधून २ हजार २८५ मते डॉ. पाटील यांना, तर १ हजार ८८१ मते सतीश चव्हाण यांना हस्तांतरित झाली. त्यानंतर ३९व्या वगळणीच्या टप्प्यात रविराज साबळे-पाटील यांच्या मतपत्रिकांमधून ६ हजार ४६९ मते डॉ. पाटील यांना, तर ३ हजार २४१ मते सतीश चव्हाण यांना मिळाली. एकूण ४१ उमेदवारांपैकी ३९ उमेदवारांची वगळणी झाल्यानंतर डॉ.
प्रतापसिंह पाटील आणि सतीश चव्हाण हे दोन उमेदवार शिल्लक राहिले. या टप्प्यावरही दोघांपैकी कोणालाही निश्चित मतांचा कोटा गाठता आला नाही. अखेरच्या मतमोजणीत डॉ. पाटील यांना ८५ हजार ८७६, तर सतीश चव्हाण यांना ६७ हजार ७५२ मते मिळाली. त्यामुळे डॉ. पाटील यांनी १८ हजार १२४ मतांच्या मताधिक्याने विजय मिळविला. मंगळवारी (दि. २७) सकाळी ८ वाजता सुरू झालेली मतमोजणी गुरुवारी (दि. २९) पहाटे अंतिम निकाल जाहीर होईपर्यंत सलग ४५ तासांहून अधिक काळ सुरू होती.
