आरंभ मराठी / ढोकी
ऊसदराच्या मागणीसाठी शेतकऱ्यांचे आंदोलन सुरू असतानाच कसबे तडवळे येथील एस. पी. शुगरचे सुरेश पाटील यांनी बुधवारी मध्यरात्री ढोकीजवळ रास्ता रोको आंदोलन केले. अचानक करण्यात आलेल्या या आंदोलनामुळे लातूर-टेंभुर्णी राष्ट्रीय महामार्गावरील वाहतूक ठप्प झाली. मुंबई, पुण्याकडे जाणाऱ्या प्रवासी बससह अन्य वाहनांच्या रांगा लागल्याने प्रवाशांना मोठ्या त्रासाला सामोरे जावे लागले.
तेरणा पट्ट्यात सध्या ऊसदराच्या मागणीवरून शेतकरी आंदोलन तीव्र झाले आहे. कारखान्यांकडे जाणाऱ्या ऊसाच्या वाहनांना अडवून कारखाने सुरू न करू देण्याची भूमिका शेतकरी संघर्ष समितीने घेतली आहे. बुधवारी रात्री ढोकी येथे ऊसाची वाहने अडविल्यानंतर सुरेश पाटील तेथे पोहोचले. यावेळी शेतकरी आणि त्यांच्यात वाद झाला. त्यांनी शेतकऱ्यांना धमकावल्याने वाद चिघळला. शेतकऱ्यांनी त्यांना तेथून परत पाठविल्यानंतर पाटील तडवळे येथे गेले.
आपल्यावर हल्ला झाल्याचा आरोप करीत त्यांनी गावकऱ्यांना आंदोलनात सहभागी होण्याचे आवाहन केले. त्यानंतर कारखान्यातील कामगारांना सोबत घेऊन त्यांनी रात्री सुमारे अकराच्या सुमारास ढोकीजवळील धाराशिव फाटा त्रिकोण चौकात रास्ता रोको सुरू केला. सुमारे दीड तास हे आंदोलन सुरू होते. त्यामुळे राष्ट्रीय महामार्गावरील वाहतूक विस्कळीत झाली.
दरम्यान, तणावाची परिस्थिती निर्माण झाल्याने पोलिसांनी ढोकी परिसरातील बंदोबस्त वाढविला होता.
_
शेतकरी-कारखानदार आमनेसामने
ऊसदराच्या मागणीसंदर्भात जिल्हा प्रशासन, कारखानदार आणि शेतकरी संघटनांच्या पदाधिकाऱ्यांमध्ये बुधवारी जिल्हाधिकारी कार्यालयात बैठक झाली. मात्र, या बैठकीत दराबाबत तोडगा निघाला नाही. मागणी मान्य होईपर्यंत कारखाने सुरू होऊ देणार नसल्याची भूमिका शेतकऱ्यांनी घेतली आहे. दुसरीकडे कारखाना सुरू ठेवण्याच्या भूमिकेवर काही कारखानदार ठाम असल्याने तेरणा पट्ट्यातील संघर्ष अधिक तीव्र होण्याची चिन्हे आहेत.
_
पाटील, भाव द्या नाहीतर संयम ठेवा, संघर्ष कशासाठी ?
शेतकऱ्यांनी ऊसाला प्रतिटन पाच हजार रुपये दराची मागणी केली आहे. दराबाबत चर्चा सुरू असतानाच ऊस वाहतूक रोखणे स्वभाविक आहे. पण त्याला विरोध म्हणून कारखानदारांकडून रास्ता रोको होणे, हे आश्चर्यकारक आहे.
यामुळे प्रश्न चर्चेऐवजी थेट संघर्षाच्या दिशेने जात असल्याचे चित्र आहे.त्यामुळे सुरेश पाटील यांनी भाव द्यावा किंवा संयम बाळगावा.
