डी मार्ट समोरील दुर्घटना, पोदार शाळेचा विद्यार्थी
आरंभ मराठी / धाराशिव
शाळेतून सायकलवर घरी निघालेल्या सहावीत शिकणाऱ्या एका विद्यार्थ्याला भरधाव ट्रकने चिरडल्याने विद्यार्थ्याचा जागीच मृत्यू झाल्याची घटना शहरातील छत्रपती संभाजी नगर-सोलापूर राष्ट्रीय महामार्गावर डी मार्टसमोर मंगळवारी दुपारी साडेतीनच्या सुमारास घडली आहे. छ्त्रपती संभाजी नगर ते सोलापूर राष्ट्रीय महामार्गावर बायपासला पर्यायी रस्ता नसल्याने चिमुकल्याचा बळी गेला असून, या घटनेनंतर प्रशासनाविरोधात संताप व्यक्त होत आहे.
मिळालेल्या माहितीनुसार पोदार शाळेत इयत्ता सहावीमध्ये शिकणाऱ्या एका पोलिस कर्मचाऱ्याचा मुलगा अर्णव अजय सोनवणे (12,रा.डेक्कन कॅम्प, धाराशिव ) मंगळवारी दुपारी शाळा सुटल्यानंतर सायकलवरून शाळेतून घराकडे जात होता. तो डी मार्टसमोर आल्यानंतर सोलापूरहून छत्रपती संभाजी नगरकडे कांदा घेऊन जाणाऱ्या भरधाव ट्रकने (केए 13 बी 1773) त्याला जोरदार धडक दिली. विद्यार्थ्याला धडक दिल्यानंतर ट्रक पलटी रस्त्याखाली जाऊन पलटी झाला. या धडकेत विद्यार्थ्यांचा जागीच मृत्यू झाला.
महामार्गाला बायपास रस्ता नसल्यामुळे या भागात अनेक अपघात झाले आहेत. बायपास नसल्याने नागरिकांना विरुद्ध दिशेने डी मार्टकडे तसेच पुढील नागरी वस्तीच्या रस्त्याकडे जावे लागते. या अपघातात ट्रकचेही नुकसान झाले आहे.
वाहनांसाठी सूचना फलक नाही
राष्ट्रीय महामार्गालगत पोदार शाळा आहे. या शाळेत शहरातील तसेच ग्रामीण भागातील शेकडो विद्यार्थी शिक्षण घेत आहेत तसेच डी मार्टकडे दररोज हजारो ग्राहकांची ये-जा असते. मात्र या महामार्गाला पर्यायी रस्ता केलेला नसल्याने विरुद्ध दिशेने ये-जा करावी लागते.परिणामी सातत्याने अपघात होत आहेत. या भागात शाळा तसेच डी मार्ट असल्याचे सूचनाफलक लावलेले नाहीत. त्यामुळे वाहनांना अंदाज येत नाही.
