आरंभ मराठी / धाराशिव
मानवतेला काळिमा फासणारी गंभीर घटना धाराशिव जिल्ह्यात घडली असून, नराधमाने पाच वर्षीय चिमुकलीवर लैंगिक अत्याचार केल्याची घटना उघडकीस आल्याने खळबळ उडाली आहे.
यासंबधी सविस्तर वृत्त असे की, कळंब तालुक्यातील एका गावात पाच वर्षीय चिमुकलीवर तरुणाने लैंगिक अत्याचार केल्याची धक्कादायक घटना २० सप्टेंबर रोजी सायंकाळी घडल्याची तक्रार पीडित मुलीच्या आईने पोलिसांत दिली आहे.
या प्रकरणी शिराढोण पोलीस ठाण्यात संबंधित तरुणाविरुद्ध गंभीर स्वरूपाचा गुन्हा दाखल करण्यात आला आहे.
पोलिसांनी दिलेल्या माहितीनुसार, पीडित चिमुकली २० सप्टेंबर २०२६ रोजी सायंकाळी चार वाजण्याच्या सुमारास गावातील एका तरुणाच्या संपर्कात आली. संबंधित तरुणाने तिला त्याच्या राहत्या घराच्या गच्चीवर नेऊन तिच्यावर लैंगिक अत्याचार केल्याचा आरोप तक्रारीत करण्यात आला आहे. घटनेनंतर पीडित मुलीच्या आईने २१ सप्टेंबर रोजी शिराढोण पोलीस ठाण्यात प्रथम खबर दिली.
या तक्रारीवरून पोलिसांनी भारतीय न्याय संहितेतील कलम ६४, ६४(२) तसेच बाल लैंगिक अत्याचार प्रतिबंधक अधिनियम (पॉक्सो) २०१२ मधील कलम ४(२) व १२ अन्वये गुन्हा नोंदविला आहे. घटनेचा पुढील तपास शिराढोण पोलीस करीत आहेत.
