आरंभ मराठी / धाराशिव
महाराष्ट्र राज्य मार्ग परिवहन महामंडळाच्या (एसटी) वतीने सवलतधारक प्रवाशांसाठी सुरू करण्यात आलेल्या NCMC (नॅशनल कॉमन मोबिलिटी कार्ड) स्मार्ट कार्डच्या विक्रीत गैरप्रकार आढळल्याने राज्य सरकारने कडक भूमिका घेतली आहे. जादा दर आकारणाऱ्या अधिकृत विक्रेत्यांचे परवाने तात्काळ रद्द करण्यात येतील, असा स्पष्ट इशारा परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिला आहे.
एसटी महामंडळाने राज्यभरात ३ हजारांहून अधिक अधिकृत विक्रेत्यांची नियुक्ती केली असून, प्रत्येक आगार आणि प्रमुख बसस्थानकांवर NCMC कार्ड उपलब्ध करून देण्यात आले आहे. नव्या कार्डसाठी १९९ रुपये, तर पूर्वी स्मार्ट कार्ड असलेल्या प्रवाशांसाठी १४९ रुपये दर निश्चित करण्यात आला आहे. मात्र, काही विक्रेत्यांकडून सवलतधारक प्रवाशांकडून अवाजवी शुल्क आकारले जात असल्याच्या तक्रारी समोर आल्या आहेत.
या पार्श्वभूमीवर काही विक्रेत्यांचे परवाने आधीच रद्द करण्यात आल्याची माहितीही सरनाईक यांनी दिली. धाराशिव जिल्ह्यातील धाराशिव, तुळजापूर, कळंब येथील बस स्थानकावर या कॉर्डसाठी २५० ते ३०० रुपये आकारले जात होते.
त्याविरोधात दैनिक आरंभ मराठीने वेळोवेळी आवाज उठवून त्यासंदर्भातील वृत्त प्रसिद्ध केले होते. दरम्यान, एसटी सेवा अधिक पारदर्शक आणि डिजिटल करण्याच्या उद्देशाने NCMC कार्ड प्रणाली लागू करण्यात आली आहे. सध्या महिला, ज्येष्ठ नागरिक आणि ‘अमृत’ ज्येष्ठ नागरिकांची नोंदणी व कार्ड वितरण सुरू असून, लवकरच इतर सवलतधारक प्रवाशांनाही या योजनेत समाविष्ट केले जाणार आहे.
महामंडळाच्या सूचनेनुसार, आगामी काळात सवलतधारक प्रवाशांसाठी एसटी प्रवासात NCMC कार्डचा वापर अनिवार्य केला जाणार आहे. यामुळे तिकीट वितरण, कार्ड टॉप-अप आणि इतर व्यवहार अधिक सुलभ व पारदर्शक होतील. तसेच, एकसंध मानक कार्यपद्धती (SOP) लागू करण्यात आली असून, सर्व आगार व्यवस्थापकांना तिची काटेकोर अंमलबजावणी करण्याचे निर्देश देण्यात आले आहेत.
या उपक्रमामुळे एसटी सेवा अधिक आधुनिक, पारदर्शक आणि प्रवासी-केंद्रित होणार असल्याचा विश्वास मंत्री सरनाईक यांनी व्यक्त केला आहे.
