आरंभ मराठी / धाराशिव
धाराशिव शहरातील स्वच्छता, नागरिकांच्या आरोग्याची सुरक्षितता आणि रस्त्यांवरील वाढती समस्या लक्षात घेता धाराशिव नगरपालिकेने भटक्या कुत्र्यांनंतर आता मोकाट डुकरे व जनावरांविरोधात विशेष मोहीम हाती घेतली आहे. शहर स्वच्छ आणि सुरक्षित ठेवण्यासाठी पालिकेकडून टप्प्याटप्प्याने विविध उपाययोजना राबविल्या जात असून या मोहिमेला नागरिकांकडून सकारात्मक प्रतिसाद मिळत आहे.
दोन दिवसांपूर्वी नगरपालिकेने भटक्या कुत्र्यांच्या निर्बीजीकरणासाठी विशेष मोहीम सुरू केली होती. एका खासगी कंपनीमार्फत दररोज सुमारे २५ भटक्या कुत्र्यांवर शस्त्रक्रिया करून त्यांचे निर्बीजीकरण केले जात आहे. या मोहिमेमुळे भटक्या कुत्र्यांची वाढती संख्या नियंत्रित करण्यास मदत होणार असून नागरिकांच्या सुरक्षिततेच्या दृष्टीनेही हा महत्त्वाचा निर्णय मानला जात आहे.
यानंतर आता पालिकेने शहरातील मोकाट डुकरांचा बंदोबस्त करण्यास सुरुवात केली आहे. धाराशिव शहर हद्दीत मोठ्या प्रमाणात फिरणाऱ्या डुकरांमुळे अस्वच्छता वाढत असल्याच्या तक्रारी नागरिकांकडून सातत्याने करण्यात येत होत्या. तसेच मोकाट जनावरांमुळे वाहतुकीलाही अडथळे निर्माण होत होते.
या पार्श्वभूमीवर नगरपालिकेच्या कौन्सिल सभेत डुकरांचा व मोकाट जनावरांचा बंदोबस्त करण्याबाबत सूचना देण्यात आल्या होत्या. त्यानुसार वराह मालकांना नोटिसा बजावण्यात आल्या. पालिकेच्या सूचनेनंतर संबंधित वराह पालकांनी तात्काळ शहरातील डुकरे हटविण्याची कार्यवाही सुरू केली असल्याचे प्रशासनाने सांगितले.
याशिवाय मोकाट जनावरांच्या मालकांनाही नोटिसा देण्यात आल्या असून, जनावरे रस्त्यावर सोडू नयेत, अन्यथा कठोर कारवाई केली जाईल, असा इशाराही पालिकेकडून देण्यात आला आहे. शहर स्वच्छता, आरोग्य आणि वाहतूक व्यवस्थेच्या दृष्टीने नगरपालिकेने सुरू केलेल्या या मोहिमेचे नागरिकांकडून स्वागत करण्यात येत असून, शहर अधिक स्वच्छ आणि सुरक्षित करण्यासाठी अशा मोहिमा सातत्याने राबविण्याची मागणीही होत आहे.
