आरंभ मराठी / धाराशिव
धाराशिव जिल्ह्याच्या राजकारणात गेल्या काही दिवसांपासून सुरू असलेल्या खासदार ओमराजे निंबाळकर यांच्या पक्षांतराच्या चर्चांना अखेर पूर्णविराम मिळण्याची चिन्हे दिसू लागली आहेत. मिळालेल्या माहितीनुसार, खासदार ओमराजे निंबाळकर यांनी शिवसेना उद्धव बाळासाहेब ठाकरे पक्षाला रामराम ठोकत मुख्यमंत्री उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याचा निर्णय जवळपास निश्चित केला आहे. यासंदर्भात उद्या अधिकृत घोषणा होण्याची शक्यता व्यक्त केली जात आहे.
आज गोवर्धनवाडी या त्यांच्या मूळ गावी आयोजित करण्यात आलेल्या कार्यकर्ता मेळाव्यात ओमराजे निंबाळकर यांनी हजारो कार्यकर्त्यांशी सविस्तर चर्चा केली. विधानसभा मतदारसंघनिहाय कार्यकर्त्यांचे मत जाणून घेताना जिल्ह्याच्या भविष्यातील राजकीय दिशा, विकासकामे आणि आगामी निवडणुकांची रणनीती यावरही चर्चा झाली. या बैठकीत उपस्थित असलेल्या बहुतांश कार्यकर्त्यांनी सत्ताधारी शिवसेनेत प्रवेश करून जिल्ह्याच्या विकासासाठी अधिक प्रभावीपणे काम करण्याचा सल्ला दिल्याचे समजते.
हा निर्णय केवळ आजच्या बैठकीत झालेला नसून काही दिवसांपूर्वीच ओमराजे यांनी मनोमन निश्चित केला होता. त्याआधी त्यांनी शिवसेना नेते एकनाथ शिंदे यांच्यासोबत अनेक फेऱ्यांमध्ये चर्चा केली आहे.
शिंदे सेनेत प्रवेश करण्यापूर्वी ओमराजे निंबाळकर यांनी दोन महत्त्वाच्या अटी ठेवल्याचे समजते.
पहिली अट म्हणजे महायुतीचा घटक पक्ष म्हणून शिवसेनेत प्रवेश केल्यानंतरही तुळजापूरचे आमदार राणा जगजितसिंह पाटील यांचा प्रचार कधीच करणार नाही. तसेच भविष्यातही राणा पाटील आणि त्यांच्या कुटुंबाच्या राजकीय भूमिकेला विरोध कायम ठेवण्याची मुभा असावी, अशी भूमिका ओमराजे यांनी स्पष्ट केली होती.
दुसरी अट म्हणजे २०२९ च्या लोकसभा निवडणुकीत धाराशिव मतदारसंघातून शिवसेनेकडून उमेदवारीची हमी.
आगामी लोकसभा निवडणुकीत पक्षाने आपल्यालाच उमेदवारी द्यावी, अशी मागणी ओमराजे यांनी केली असून त्याबाबत एकनाथ शिंदे हे सकारात्मक आहेत.
राज्यात आणि केंद्रात महायुतीची सत्ता असल्यामुळे विकासकामांना गती देण्यासाठी सत्ताधारी पक्षात जाणे फायदेशीर ठरेल, असा विचार ओमराजे समर्थकांकडून व्यक्त केला जात आहे. दरम्यान, एकनाथ शिंदे यांनी धाराशिव जिल्ह्यासाठी भरीव विकास निधी उपलब्ध करून देण्याचे आश्वासन दिल्याची माहिती आहे.
याशिवाय राज्याचे मंत्री डॉ. तानाजीराव सावंत यांच्या समन्वयाने धाराशिव जिल्ह्यात शिवसेनेची संघटना अधिक मजबूत करण्याची जबाबदारीही ओमराजे यांच्यावर सोपविण्यात आल्याचे समजते.
आज झालेल्या बैठकीत बहुतांश कार्यकर्त्यांनी सत्तास्थानी असलेल्या पक्षात प्रवेश करून विकासकामांना चालना द्यावी, अशी एकमुखी भूमिका मांडली.
केंद्र आणि राज्यातील सत्तेशी थेट समन्वय साधल्यास मतदारसंघातील प्रलंबित प्रश्न मार्गी लागतील, असा विश्वासही कार्यकर्त्यांनी व्यक्त केला.
कार्यकर्त्यांच्या चर्चेनंतर ओमराजे निंबाळकर यांचा शिंदे सेनेत प्रवेश जवळपास निश्चित मानला जात आहे.
आता सर्वांचे लक्ष त्यांच्या अधिकृत भूमिकेकडे लागले असून उद्या ते पत्रकार परिषद किंवा कार्यकर्ता मेळाव्यातून आपल्या निर्णयाची घोषणा करतील, अशी शक्यता आहे. ओमराजे यांच्या संभाव्य पक्षांतरामुळे धाराशिव जिल्ह्यातील राजकीय समीकरणांमध्ये मोठे बदल होणार आहेत. विशेषतः ओमराजे आणि अंधार राणा पाटील यांच्यातील सत्तासंघर्ष पुन्हा उफाळून येणार आहे.
