आरंभ मराठी / धाराशिव
उस्मानाबाद-लातूर-बीड स्थानिक स्वराज्य संस्थांच्या विधानपरिषद निवडणुकीत महायुतीचे उमेदवार बसवराज पाटील यांनी विक्रमी मताधिक्याने विजय मिळवत विरोधकांना मोठा धक्का दिला आहे. बसवराज पाटील यांनी काँग्रेसचे उमेदवार महेश देशमुख यांचा तब्बल 721 मतांनी पराभव केला आहे.
अधिकृत निकालाची घोषणा काही वेळात होणार असली तरी मतमोजणी केंद्राबाहेर महायुतीच्या कार्यकर्त्यांनी जल्लोषाला सुरुवात केली आहे. मतमोजणीत बसवराज पाटील यांना 845 मते मिळाली, तर महेश देशमुख यांना केवळ 124 मतांवर समाधान मानावे लागले. याशिवाय 14 मते बाद ठरली. या मतदारसंघात एकूण 988 मतदार असून त्यापैकी 983 मतदारांनी मतदानाचा हक्क बजावला होता.
निवडणुकीच्या सुरुवातीपासूनच महायुतीने जोरदार मोर्चेबांधणी केली होती. उमेदवारी अर्ज दाखल झाल्यानंतर भाजप आणि महायुतीतील घटक पक्षांनी स्थानिक स्वराज्य संस्थांमधील सदस्यांशी सातत्याने संपर्क साधत प्रचाराची आघाडी कायम ठेवली. त्याचा परिणाम निकालात स्पष्टपणे दिसून आला.
उपलब्ध आकडेवारीनुसार महायुतीकडे सहाशेहून अधिक मते निश्चित मानली जात होती, तर महाविकास आघाडीकडे सुमारे अडीचशे मतांचे संख्याबळ असल्याचा अंदाज व्यक्त करण्यात येत होता. मात्र प्रत्यक्ष निकालात बसवराज पाटील यांना अपेक्षेपेक्षा खूपच जास्त मते मिळाल्याने महायुतीने महाविकास आघाडीतील काही मतदारांची मते आपल्या बाजूने वळविण्यात यश मिळवल्याचे स्पष्ट झाले आहे. महाविकास आघाडीची तब्बल 80 मते फुटल्याचा अंदाज आहे.
महेश देशमुख यांना काँग्रेसच्या पारंपरिक मतदारांचीही संपूर्ण साथ मिळालेली नसल्याचे मतांच्या आकडेवारीवरून दिसून येत आहे. त्यामुळे महाविकास आघाडीतील अंतर्गत विसंवाद आणि मतांची विभागणी हा या निवडणुकीतील चर्चेचा विषय ठरला आहे. या निवडणुकीत खासदार ओमराजे निंबाळकर यांनी महेश देशमुख यांच्या उमेदवारी अर्ज दाखल करताना सक्रिय सहभाग घेतला होता.
मात्र त्यानंतर त्यांच्या संभाव्य पक्षांतराच्या चर्चांना वेग आला. त्यांनी घेतलेल्या राजकीय भूमिकेचा आणि शिवसेना (उद्धव बाळासाहेब ठाकरे) पक्षातील निर्माण झालेल्या संभ्रमाचा मतदानावर परिणाम झाला. शिवसेना (उबाठा) पक्षाशी संबंधित काही मतदारांनीही महायुतीच्या उमेदवाराला पाठिंबा दिल्याचे मतांच्या आकडेवारीवरून सूचित होत आहे. या निकालामुळे महायुतीचे स्थानिक स्वराज्य संस्थांमधील वर्चस्व आणखी मजबूत झाले आहे.
अधिकृत निकाल जाहीर होण्यापूर्वीच मतमोजणी केंद्राबाहेर महायुतीच्या कार्यकर्त्यांनी फटाके फोडून आणि घोषणाबाजी करत जल्लोष सुरू केला आहे. थोड्याच वेळात विजयी उमेदवार बसवराज पाटील यांची भव्य विजय मिरवणूक काढण्यात येणार आहे.
