आरंभ मराठी / तुळजापूर
महाराष्ट्राच्या राजकारणात सध्या दररोज नवनवीन घडामोडी घडत आहेत. राष्ट्रवादी काँग्रेस शरद पवार पक्षाचे नेते जयंत पाटील गेल्या काही दिवसांपासून भाजप आणि शिवसेनेच्या नेत्यांसोबत भेटी घेत आहेत.त्यामुळे शरद पवारांचा पक्ष एनडीएसोबत जाणार का यावर जोरदार चर्चा सुरू असतानाच या घडामोडींमध्ये जयंत पाटील चर्चेच्या केंद्रस्थानी आहेत.
दुसरीकडे शिवसेना पक्ष प्रमुख आणि उपमुख्यमंत्री एकनाथ शिंदे यांच्या दिल्लीकडे चकरा वाढल्या असून, कोण कोणासोबत जाणार, राष्ट्रवादीच्या दोन्हीं गटाचे विलीकरण होणार का, जयंत पाटलांना अर्थमंत्री पद मिळणार का, याबाबत चर्चा जोर धरत असतानाच जयंत पाटील आज सकाळी तातडीने महाराष्ट्राची कुलस्वामिनी तुळजाभवानी मातेच्या दर्शनासाठी आले. त्यांनी अचानक केलेल्या या दौऱ्याने चर्चेला उधाण आले असून, त्यांनी देवीकडे कोणते गाऱ्हाणे मांडले, कोणते आशीर्वाद मागितले, अशी चर्चा सुरू झाली आहे.
जयंत पाटील हे आज पहाटे तुळजापुरात आले. त्यांनी सकाळी तुळजाभवानी मातेची पूजा करून दर्शन घेतले. यावेळी पोलिस अधीक्षक रितू खोखर यांनी त्यांचे स्वागत केले. त्यानंतर ते तातडीने पंढरपूरच्या दिशेने निघाले. त्यांच्या अचानक झालेल्या या दौऱ्याची जोरदार चर्चा सुरू आहे. येणाऱ्या काळात घडामोडींकडे राज्याचे लक्ष लागले आहे.
