आरंभ मराठी / धाराशिव
दुष्काळग्रस्त शेतकऱ्यांच्या मदतीसाठी श्री गजानन महाराज संस्थान, शेगावने मुख्यमंत्री सहाय्यता निधीत १ कोटी ११ लाख रुपयांची मदत दिली. या उपक्रमामुळे धार्मिक संस्थांच्या सामाजिक उत्तरदायित्वाचा मुद्दा पुन्हा चर्चेत आला आहे. तुळजाभवानी मंदिर संस्थान शेतकऱ्यांसाठी कधी पुढे येणार असा सवाल विचारला जात आहे.
धाराशिव जिल्ह्यात यंदा पावसाने ओढ दिल्याने शेतीसमोर मोठे संकट उभे राहिले आहे. पिकांचे नुकसान, पाण्याची टंचाई आणि जनावरांच्या चारा-पाण्याचा प्रश्न गंभीर होत आहे. अशा परिस्थितीत तुळजाभवानी मंदिर संस्थाननेही जिल्ह्यातील दुष्काळग्रस्त गावांच्या मदतीसाठी पुढाकार घ्यावा, अशी अपेक्षा व्यक्त होत आहे.
तुळजाभवानी मंदिर संस्थानने जिल्ह्यातील काही दुष्काळग्रस्त गावे दत्तक घेऊन तेथील नागरिक आणि पशुधनासाठी पिण्याचे पाणी, जनावरांसाठी चारा तसेच आवश्यक मदत उपलब्ध करून दिल्यास मोठा आधार मिळू शकतो.
तुळजापूरच्या तुळजाभवानी मंदिराला देशभरातून भाविक येतात. संस्थानकडे उपलब्ध असलेल्या साधनसंपत्तीच्या माध्यमातून दुष्काळाच्या काळात स्थानिक शेतकरी आणि पशुधनासाठी मदतीचा हात पुढे करण्याची गरज आहे.
शेगावच्या संस्थानने दाखवलेल्या पुढाकारानंतर आता तुळजाभवानी मंदिर संस्थान दुष्काळग्रस्त धाराशिवकरांच्या मदतीसाठी काय भूमिका घेणार, याकडे जिल्ह्याचे लक्ष लागले आहे.
