आरंभ मराठी / धाराशिव
दारूच्या नशेत एका व्यक्तीने फोन करून धाराशिव शहरातील पोलिस दलात खळबळ उडवून दिली. एका फोन कॉल मुळे पोलिस प्रशासन खडबडून जागे झाले. मात्र हा फोन मद्यधुंद अवस्थेतील नागरिकाने केला असल्याचे लक्षात येताच पोलिसांनी सुस्कारा सोडला. डायल 112 वर कॉल करून 15 ऑगस्टला प्रियांका कांबळे नामक व्यक्ती बॉम्बस्फोट करणार आहे, अशी खोटी माहिती देऊन पोलिसांची दिशाभूल करणाऱ्या एका इसमाविरुद्ध धाराशिव शहर पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, दि. 3 ऑगस्ट 2026 रोजी सायंकाळी 7.24 वाजण्याच्या सुमारास शितल रघुनाथ कांबळे (वय 45, रा. काकडे प्लॉट, शाहूनगर, धाराशिव) यांनी डायल 112 वर कॉल करून बॉम्बस्फोटाबाबतची माहिती दिली.
माहिती मिळताच धाराशिव शहर पोलिसांचे पथक तातडीने डायल 112 वाहनासह घटनास्थळी दाखल झाले. मात्र, चौकशीदरम्यान संबंधित ठिकाणी कोणतीही संशयास्पद घटना घडलेली नसल्याचे स्पष्ट झाले. तसेच शितल कांबळे हे मद्याच्या अमलाखाली असल्याचे पोलिसांच्या निदर्शनास आले. त्यानंतर त्यांची वैद्यकीय तपासणी करण्यात आली. पोलिसांना खोटी माहिती देऊन शासकीय यंत्रणेचा वेळ व संसाधनांचा अपव्यय केल्याप्रकरणी त्यांच्याविरुद्ध धाराशिव शहर पोलीस ठाण्यात गुन्हा नोंद करण्यात आला.
