आरंभ मराठी / कळंब
धाराशिव जिल्ह्यातील कळंब शहरालगत येरमाळा रस्त्यावरील पाझर तलाव परिसरात स्थानिक गुन्हे शाखा व कळंब पोलिसांनी संयुक्त कारवाई करत एमडी (मेफेड्रोन) या अंमली पदार्थाची विक्री करण्याच्या तयारीत असलेल्या दोन तरुणांना ताब्यात घेतले. त्यांच्या ताब्यातून ११.२१ ग्रॅम मेफेड्रोनच्या २९ प्लास्टिक पुड्या तसेच एक हिरो स्प्लेंडर दुचाकी असा एकूण १ लाख १० हजार रुपयांचा मुद्देमाल जप्त करण्यात आला आहे. या प्रकरणी कळंब पोलीस ठाण्यात एनडीपीएस कायद्यान्वये गुन्हा दाखल करण्यात आला असून पुढील तपास सुरू आहे. मागील काही दिवसांपासून धाराशिव जिल्ह्यात एमडी या घातक अंमली पदार्थाची तरुणांमध्ये विक्री होत असल्याची गोपनीय माहिती पोलीस यंत्रणेला मिळत होती. या पार्श्वभूमीवर जिल्हा पोलीस अधीक्षक श्रीमती रितू खोकर यांनी स्थानिक गुन्हे शाखेला अशा गुन्ह्यांवर विशेष लक्ष ठेवून कारवाई करण्याच्या सूचना दिल्या होत्या.
त्याअनुषंगाने ३ ऑगस्ट २०२६ रोजी स्थानिक गुन्हे शाखेचे प्रभारी पोलीस निरीक्षक विनोद इज्जपवार हे पथकासह कळंब पोलीस ठाणे हद्दीत गस्त घालत असताना गोपनीय माहितीदारामार्फत खात्रीशीर माहिती मिळाली. त्यानुसार निखिल युवराज जाधव (वय २४) व अरविंद दादाराव कांबळे (वय २४, दोघेही रा. कळंब, जि. धाराशिव) हे स्वतःच्या आर्थिक फायद्यासाठी एमडी (मेफेड्रोन) या अंमली पदार्थाची विक्री करण्यासाठी कळंब–येरमाळा रस्त्यावरील पाझर तलाव परिसरात येणार असल्याचे समजले. या माहितीच्या आधारे एनडीपीएस कायद्यातील सर्व तरतुदींचे पालन करून फॉरेन्सिक पथक, पंच व पोलीस कर्मचाऱ्यांसह ४ ऑगस्ट रोजी पहाटे ४.३० ते ५.१९ या वेळेत पाझर तलाव परिसरात सापळा रचण्यात आला. यावेळी रस्त्याच्या कडेला दुचाकी लावून उभ्या असलेल्या दोघा संशयितांना ताब्यात घेण्यात आले. पंचांसमक्ष घेतलेल्या अंगझडतीत त्यांच्या ताब्यातून पांढऱ्या स्फटिक स्वरूपातील ११.२१ ग्रॅम वजनाचे मेफेड्रोन (एमडी) या अंमली पदार्थाच्या २९ पारदर्शक प्लास्टिक पुड्या आढळून आल्या. जप्त करण्यात आलेल्या मेफेड्रोनची अंदाजे किंमत ५५ हजार रुपये असून आरोपींकडील एमएच-२५ बीडी-४३४२ क्रमांकाची काळ्या रंगाची हिरो स्प्लेंडर दुचाकी (किंमत अंदाजे ५५ हजार रुपये) देखील जप्त करण्यात आली. अशा प्रकारे एकूण १ लाख १० हजार रुपयांचा मुद्देमाल पोलिसांनी हस्तगत केला.
याप्रकरणी कळंब पोलीस ठाण्यात गुन्हा नोंदवून एनडीपीएस कायदा १९८५ मधील कलम ८(सी) व २२(बी) अन्वये गुन्हा दाखल करण्यात आला आहे. सपोनि मगर यांनी फिर्याद दिली असून पुढील तपास पोलीस निरीक्षक शेख यांच्या मार्गदर्शनाखाली सुरू आहे.
ही कारवाई पोलीस अधीक्षक श्रीमती रितू खोकर, अपर पोलीस अधीक्षक सचिन पांडकर आणि उपविभागीय पोलीस अधिकारी संजय पवार यांच्या मार्गदर्शनाखाली स्थानिक गुन्हे शाखेचे प्रभारी पोलीस निरीक्षक विनोद इज्जपवार, सपोनि खटके, सपोनि मगर तसेच स्थानिक गुन्हे शाखा व कळंब पोलीस ठाण्यातील अधिकारी, कर्मचारी आणि फॉरेन्सिक पथकाने संयुक्तरीत्या केली.
