आरंभ मराठी / धाराशिव
उमरगा तालुक्यातील हिप्परगाववाडी येथे शेतजमिनीत आणि घरालगतच्या मोकळ्या जागेत अवैधरीत्या गांजाची लागवड केल्याचा प्रकार उघडकीस आला आहे. अंमली पदार्थ विरोधी टास्क फोर्सच्या छत्रपती संभाजीनगर कृती विभागाने ९ ऑक्टोबर रोजी केलेल्या कारवाईत ३४४.६५ किलो वजनाची गांजाची झाडे जप्त केली. या मुद्देमालाची एकूण किंमत १ कोटी ७२ लाख ३२ हजार ५०० रुपये असल्याचे पोलिसांनी सांगितले. या प्रकरणी दोघांविरुद्ध उमरगा पोलीस ठाण्यात अंमली पदार्थ प्रतिबंधक कायद्यानुसार गुन्हा दाखल करण्यात आला आहे. राज्यात अंमली पदार्थांची अवैध विक्री, वितरण, वाहतूक आणि तस्करी रोखण्यासाठी अंमली पदार्थ विरोधी टास्क फोर्सची स्थापना करण्यात आली आहे. विशेष पोलीस महानिरीक्षक ज्योतीप्रिया सिंग यांच्या नेतृत्वाखाली राज्यात सात कृती विभाग कार्यरत आहेत.
त्यापैकी छत्रपती संभाजीनगर कृती विभागाच्या कार्यक्षेत्रात छत्रपती संभाजीनगर शहर व ग्रामीण भागासह बीड, जालना आणि धाराशिव जिल्ह्यांचा समावेश आहे. ९ ऑक्टोबर रोजी मिळालेल्या गोपनीय माहितीच्या आधारे टास्क फोर्सच्या पथकाने उमरगा तालुक्यातील हिप्परगाववाडी येथील सर्वे क्रमांक ४३/१३ मधील शेतजमीन आणि घरालगतच्या मोकळ्या जागेवर छापा टाकला. या ठिकाणी गांजाची झाडे लावल्याचे आढळून आले. पोलिसांनी ३४४.६५ किलो वजनाची गांजाची झाडे जप्त केली. या प्रकरणी कन्हैया विलास भांगे आणि सुधाकर खवडे (दोघेही रा. हिप्परगाववाडी, ता. उमरगा) यांच्याविरुद्ध उमरगा पोलीस ठाण्यात अंमली पदार्थ प्रतिबंधक कायदा १९८५ मधील कलम ८(क) आणि २०(अ), २०(ब)(ii)(क) अन्वये गुन्हा दाखल करण्यात आला आहे. ही कारवाई विशेष पोलीस महानिरीक्षक ज्योतीप्रिया सिंग, पोलीस उपमहानिरीक्षक प्रवीणकुमार पाटील, पोलीस अधीक्षक अजित टिके आणि पोलीस उपअधीक्षक साईनाथ ठोंबरे यांच्या मार्गदर्शनाखाली करण्यात आली.
पोलीस निरीक्षक गीता बागवडे, पोलीस उपनिरीक्षक प्रदीप ठाकूर यांच्यासह सफौ वाहेद मुल्ला, हनुमान पुरके, पोलीस हवालदार कैलास गाडेकर, रविंद्र साळवे, साईनाथ आगीवाले, सुरेश राऊत, महिला पोलीस हवालदार शैला टिळे, पोलीस अंमलदार नागेश केंद्रे, सूरज जोनवाल, ज्ञानेश्वर चव्हाण, निलेश सरपाळे, महिला पोलीस अंमलदार आम्रपाली सूर्यवंशी, चालक पोलीस अंमलदार ज्ञानेश्वर शेलार आणि महिला पोलीस अंमलदार प्रियंका पवार यांच्या पथकाने ही कारवाई केली. छत्रपती संभाजीनगर शहर व ग्रामीण भागासह बीड, जालना आणि धाराशिव जिल्ह्यांत अंमली पदार्थांची तस्करी, विक्री, वाहतूक किंवा लागवड होत असल्याची माहिती नागरिकांनी पोलिसांना द्यावी, असे आवाहन टास्क फोर्सने केले आहे.
