आरंभ मराठी / धाराशिव
‘हरित धाराशिव अभियान २.०’च्या माध्यमातून अवघ्या १२ तासांत १० लाखांहून अधिक वृक्षांची लागवड करून धाराशिव जिल्ह्याने गिनीज वर्ल्ड रेकॉर्डमध्ये नवा विक्रम नोंदविला. मात्र, हा विक्रम केवळ आकड्यांपुरता मर्यादित न राहता लावलेली प्रत्येक रोपे जगविण्याचा संकल्प करण्याची गरज आहे. “आपण विक्रम तर केलाच; पण त्यापेक्षा मोठा विक्रम झाडे जगविण्याचा करूया,” असे आवाहन पालकमंत्री प्रताप सरनाईक यांनी केले. धाराशिवजवळील शिंगोली येथील वन विभागाच्या जागेसह जिल्ह्यातील आठ ठिकाणी १४ ऑगस्ट रोजी ‘हरित धाराशिव २.०’अंतर्गत तब्बल १० लाख ११ हजार स्थानिक प्रजातींच्या रोपांची लागवड करण्यात आली. या विक्रमाची अधिकृत नोंद गिनीज वर्ल्ड रेकॉर्डमध्ये झाली. यानिमित्त शिंगोली येथे आयोजित कार्यक्रमात पालकमंत्री सरनाईक बोलत होते.
यावेळी जिल्हा परिषद अध्यक्षा अर्चना पाटील, खासदार ओमप्रकाश राजेनिंबाळकर, जिल्हा परिषद उपाध्यक्षा उषा गायकवाड, अभिनेते तथा देवराईचे अध्यक्ष सयाजी शिंदे, जिल्हाधिकारी कीर्ती किरण पुजार, जिल्हा परिषदेच्या मुख्य कार्यकारी अधिकारी प्रियंवदा म्हाडदळकर, पोलिस अधीक्षक रितू खोखर, लेखक अरविंद जगताप आणि शिंगोलीच्या सरपंच योगिता शिंदे आदी उपस्थित होते. ‘एक पेड माँ के नाम’ या पंतप्रधान नरेंद्र मोदी यांच्या संदेशातून प्रेरणा घेत आणि मुख्यमंत्री देवेंद्र फडणवीस यांच्या ‘हरित महाराष्ट्र, समृद्ध महाराष्ट्र’ या संकल्पनेला बळ देत धाराशिव जिल्ह्यात पर्यावरण संवर्धनाची लोकचळवळ उभी करण्यात येत आहे. ‘हरित धाराशिव अभियान १.०’मध्ये १९ जुलै २०२५ रोजी एकाच दिवशी १७ लाख १ हजार ८१५ वृक्षांचे रोपण करण्यात आले होते. यातील ८६.९७ टक्के रोपे जिवंत राहिल्याचे पालकमंत्री सरनाईक यांनी सांगितले.
‘हरित धाराशिव २.०’मध्ये जिल्ह्यातील आठ ठिकाणी ८३.२६ एकर क्षेत्रावर मियावाकी पद्धतीने घनवन विकसित केले जात आहे. प्रत्येक रोपाला स्वतंत्र QR कोड देऊन डिजिटल नोंद करण्यात आली असून छायाचित्रण, व्हिडिओ रेकॉर्डिंग, ड्रोन शूटिंग आणि हस्तलिखित लॉगबुकच्या माध्यमातून लागवडीची अचूक नोंद ठेवण्यात आली. अभिनेते तथा देवराईचे अध्यक्ष सयाजी शिंदे यांनी युवा वर्गाने पर्यावरण संवर्धनात सक्रिय सहभाग घेण्याचे आवाहन केले. “माणूस जगातून जाताना काहीही सोबत घेऊन जात नाही; मात्र अन्न आणि श्वास झाडांपासूनच मिळतो,” असे सांगत प्रत्येक व्यक्तीने आपल्या वयाएवढी झाडे लावावीत, असे त्यांनी आवाहन केले. देशी वृक्षांच्या लागवडीला प्राधान्य देण्याची गरज असल्याचेही त्यांनी सांगितले.
जिल्हाधिकारी कीर्ती किरण पुजार यांनी सांगितले की, जिल्ह्यातील ४० हून अधिक रोपवाटिकांमधून रोपे तयार करण्यात आली. १२ तासांत १० लाख वृक्षलागवडीची मोहीम जिल्हा प्रशासनासोबतच सेवाभावी संस्था, विद्यार्थी, नागरिक, स्वयंसेवक आणि विविध कंपन्यांच्या सहकार्याने यशस्वी झाली. यासाठी २४ वनस्पतिशास्त्रज्ञ, स्वतंत्र निरीक्षक आणि नोडल अधिकाऱ्यांची नियुक्ती करण्यात आली होती. धाराशिवमध्ये केवळ ०.१ टक्के वनक्षेत्र असून ते वाढविण्याची गरज आहे. मागील वर्षी लावलेल्या १५ लाख वृक्षांपैकी १३ लाख झाडे जिवंत असल्याचेही पुजार यांनी सांगितले. जिल्ह्यात देवराई प्रकल्प उभारून वनक्षेत्र वाढविण्याचा प्रयत्न करण्यात येणार असल्याचे त्यांनी स्पष्ट केले. ‘हरित धाराशिव २.०’अंतर्गत १२ तासांत १० लाख वृक्षलागवड पूर्ण केल्याबद्दल गिनीज वर्ल्ड रेकॉर्डचे प्रतिनिधी ऋषी नाथ यांच्या हस्ते जिल्हाधिकारी कीर्ती किरण पुजार यांना प्रमाणपत्र प्रदान करण्यात आले. यावेळी पालकमंत्री प्रताप सरनाईक उपस्थित होते.
कार्यक्रमात अभियानासाठी सहकार्य करणाऱ्या विविध संस्था व प्रतिनिधींचा मान्यवरांच्या हस्ते सन्मान करण्यात आला. कार्यक्रमाच्या प्रारंभी जगद्गुरू संत तुकाराम महाराजांच्या प्रतिमेचे पूजन व दीपप्रज्वलन करण्यात आले. कार्यक्रमानंतर पालकमंत्री सरनाईक आणि उपस्थित मान्यवरांच्या हस्ते वृक्षारोपण करण्यात आले. कार्यक्रमास विविध विभागांचे अधिकारी, कर्मचारी, विद्यार्थी व नागरिक मोठ्या संख्येने उपस्थित होते.
