आरंभ मराठी | धाराशिव
धाराशिवचे खासदार ओमराजे निंबाळकर यांनी मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याचा निर्णय निश्चित केल्यानंतर जिल्ह्याच्या राजकीय घडामोडींना वेग आला आहे. या पार्श्वभूमीवर शिवसेना पक्षाच्या धाराशिव शहरातील संघटनात्मक बांधणीला अधिक बळकटी देण्यासाठी प्रदेश पातळीवरून नवीन पदाधिकाऱ्यांच्या नियुक्त्या जाहीर करण्यात आल्या आहेत.
शिवसेना पक्षाची धाराशिव शहरातील संघटना अधिक सक्षम, गतिमान आणि प्रभावी करण्याच्या उद्देशाने या नियुक्त्या करण्यात आल्याचे पक्षाकडून सांगण्यात आले. नव्या नियुक्त्यांनुसार सुजित उंबरे, विकास जाधव, रोहन डोंगरे आणि सादिक तांबोळी यांची धाराशिव उपशहर प्रमुखपदी नियुक्ती करण्यात आली आहे.
तसेच प्रविण पवार यांच्याकडे धाराशिव शहर संघटकपदाची जबाबदारी सोपविण्यात आली असून अमर चिलवंत यांची धाराशिव शहर समन्वयक म्हणून नियुक्ती करण्यात आली आहे. मुंबई येथे आयोजित कार्यक्रमात नवनियुक्त पदाधिकाऱ्यांना नियुक्तीपत्रांचे वितरण करण्यात आले.
यावेळी शिवसेना संपर्क प्रमुख तथा माजी खासदार उन्मेश पाटील, शिवसेना जिल्हाप्रमुख अजित पिंगळे तसेच धाराशिव शहरप्रमुख आकाश कोकाटे उपस्थित होते. पक्ष नेतृत्वाने सर्व नियुक्त्या तत्काळ प्रभावाने लागू केल्याची माहिती दिली.
दरम्यान, खासदार ओमराजे निंबाळकर यांनी आज अधिकृतपणे शिवसेनेत जाण्याचा निर्णय घेतल्यानंतर माजी मंत्री व शिवसेनेचे उपनेते डॉ. तानाजीराव सावंत यांनी गोवर्धनवाडी येथील त्यांच्या निवासस्थानी भेट घेतली. या भेटीदरम्यान शिवसेनेचे अनेक पदाधिकारी आणि कार्यकर्ते उपस्थित होते.
ओमराजे यांच्या प्रवेशामुळे जिल्ह्यातील शिवसेनेला मोठे राजकीय बळ मिळाल्याची चर्चा सुरू आहे. मात्र, ओमराजे निंबाळकर यांच्यासोबत शिवसेनेत दाखल होणाऱ्या समर्थक आणि कार्यकर्त्यांना पक्ष संघटनेत कोणत्या पद्धतीने स्थान दिले जाते, तसेच आगामी काळात संघटनात्मक पातळीवर कोणते बदल घडतात, याकडे आता जिल्ह्यातील राजकीय वर्तुळाचे लक्ष लागले आहे.
ओमराजेंच्या प्रवेशानंतर शिवसेनेतील एक गट त्यांना विरोध करत आहे. हा विरोध कितपत टिकतो याची देखील उत्सुकता आहे.
