आरंभ मराठी / तुळजापूर
तुळजाभवानी मंदिर आणि परिसरात स्वच्छता, नियम पाळण्याची जबाबदारी असलेल्या काही पुजाऱ्यांनी बेजबाबदार वर्तन केल्याचा प्रकार समोर आला असून, त्यामुळे मंदिर संस्थानने संबंधित पुजाऱ्यांना मंदिर बंदीची नोटीस बजावली आहे. श्री तुळजाभवानी मंदिर परिसरात तंबाखू व तंबाखूजन्य पदार्थांचे सेवन करून थुंकणाऱ्या आठ पुजाऱ्यांवर मंदिर संस्थानने कडक कारवाईची भूमिका घेतली आहे. अशोभनीय वर्तनामुळे संबंधित पुजाऱ्यांना तीन महिन्यांसाठी मंदिरप्रवेश बंदीची कारवाई होण्याची शक्यता आहे.
संबंधित पुजाऱ्यांनी मंदिर परिसरात तंबाखूजन्य पदार्थ खाऊन थुंकल्याचे सीसीटीव्ही फुटेजमध्ये स्पष्टपणे आढळून आले आहे. यामुळे मंदिर प्रशासनाने तातडीने दखल घेत, देऊळ कवायत कलम २४ व २५ अन्वये संबंधितांवर नोटीस बजावली आहे.
पुजाऱ्यांचे वर्तन अशोभनीय
मंदिर प्रशासनाने नोटीसमध्ये स्पष्ट केले आहे की, पुजारी व्यवसायास अशा प्रकारचे वर्तन शोभणारे नसून, मंदिर परिसरातील पावित्र्याला बाधा पोहोचवणारे आहे. यामुळे मंदिराचे कायदा व सुव्यवस्थेचे उल्लंघन होत असून, शिस्तीचा भंग होत आहे.
नोटीस मिळाल्यानंतर तीन दिवसांच्या आत स्पष्टीकरण सादर करण्याचे आदेश देण्यात आले आहेत. अन्यथा, मिळालेला खुलासा असमाधानकारक असल्यास तीन महिन्यांची मंदिरप्रवेश बंदी घालण्यात येईल, असेही नोटीसमध्ये नमूद करण्यात आले आहे.
या पुजाऱ्यांना कारणे दाखवा नोटीस
१. वैभव विशाल भोसले
२. विशाल दादासाहेब मगर
३. लखन रोहिदास भोसले
४. विशाल हनमंत चव्हाण
५. विशाल बाळासाहेब गंगणे
६. अक्षय किशोर कदम-भैय्ये
७. राहुल हनुमंत पवार
८. धीरज राजू चोपदार
_
वर्तन कसे असावे, धडे देण्याची वेळ ..?
श्री तुळजाभवानी मंदिर राज्यातील एक प्रमुख आणि पवित्र तीर्थक्षेत्र असून, दररोज हजारो भाविक येथे दर्शनासाठी येतात. अशा पवित्र जागी तंबाखूजन्य पदार्थांचे सेवन करून थुंकणे हे अत्यंत अशोभनीय असून, भाविकांच्या भावना दुखावणारे आहे. त्यामुळे भविष्यात अशा प्रकारच्या घटना टाळण्यासाठी मंदिर प्रशासनाने कडक पावले उचलण्याचे ठरवले आहे.
