आरंभ मराठी / धाराशिव
धाराशिव जिल्ह्यात बांगलादेशी महिलांकडून वेश्याव्यवसाय करून घेतला जात असल्याची खळबळजनक घटना उघडकीस आली असून, पोलीस प्रशासनाने तात्काळ कारवाई करत या प्रकरणाचा तपास सुरू केला आहे.
तुळजापूर तालुक्यातील तामलवाडी परिसरातील ‘मिलन लॉज’मध्ये काही महिलांकडून वेश्याव्यवसाय करून घेत असल्याची गुप्त माहिती पोलिसांना मिळाली होती. या माहितीच्या आधारे पोलीस अधीक्षक रितू खोकर यांनी अनैतिक मानवी प्रतिबंधक कक्षाला तातडीने कारवाई करण्याचे आदेश दिले होते.
त्याअनुषंगाने अनैतिक मानवी प्रतिबंधक कक्षाचे पोलीस निरीक्षक आर. एस. गायकवाड यांनी आपल्या पथकासह दोन दिवसांपूर्वी संबंधित लॉजवर धाड टाकली. या कारवाईदरम्यान तीन महिलांकडून वेश्याव्यवसाय सुरू असल्याचे स्पष्ट झाले. पोलिसांनी तत्काळ तिघींनाही ताब्यात घेतले. पोलिसांनी केलेल्या चौकशीत धक्कादायक बाब समोर आली.
ताब्यात घेतलेल्या तीन महिलांपैकी दोन महिला या बांगलादेशी असल्याचे निष्पन्न झाले. या घटनेमुळे जिल्ह्यात परराज्यातील तसेच परदेशी महिलांचा वापर करून अशा प्रकारचा व्यवसाय चालवला जात असल्याची गंभीर बाब समोर आली आहे.
या महिलांना धाराशिव जिल्ह्यात कोण आणि कशा प्रकारे आणले, त्यामागील दलाल कोण आहेत, तसेच या रॅकेटचा विस्तार किती मोठा आहे याचा शोध घेण्यासाठी पोलीस तपासाची व्याप्ती वाढवण्यात आली आहे.
तामलवाडी येथे बांगलादेशी महिला आढळल्याने जिल्ह्यातील इतर भागांमध्येही अशा प्रकारचे जाळे सक्रिय असण्याची शक्यता पोलिसांकडून व्यक्त केली जात आहे. त्यादृष्टीने विशेष पथके तयार करून पुढील तपास सुरू आहे.
