आरंभ मराठी / धाराशिव परंडा तालुक्यातील मौजे कुंभेज येथे माजी सैनिकाच्या घरावर सशस्त्र दरोडा टाकून प्राणघातक हल्ला करणाऱ्या कुख्यात टोळीला धाराशिव स्थानिक गुन्हे शाखेने अवघ्या २४ तासांत जेरबंद करून उल्लेखनीय कामगिरी बजावली आहे. या कारवाईमुळे परिसरात भीती पसरली होती.दिनांक २५ एप्रिल २०२६ रोजी मध्यरात्री साडेबारा वाजण्याच्या सुमारास, कुंभेज येथील कॅनॉललगत असलेल्या शेतवस्तीवर माजी सैनिक विश्वनाथ मुरलीधर जगताप हे पत्नीसमवेत घरासमोर झोपलेले असताना अज्ञात दरोडेखोरांनी अचानक हल्ला चढवला. आरोपींनी जगताप यांच्यावर चाकूने प्राणघातक वार करून त्यांना गंभीर जखमी केले, तर त्यांच्या पत्नीच्या गळ्यातील सोन्याचे दागिने जबरदस्तीने हिसकावून नेले. घटनेनंतर परिसरात भीतीचे वातावरण पसरले होते.
किरण पंडित शिंदे, राभवा निवांत्या शिंदे, ज्ञानेश्वर लिग्या काळे, विकास नागेश भोसले, सुनिल प्रकाश भोसले, चेतन किरण शिंदे, सुनिल चरण शिंदे सर्व आरोपी अनाळा, डोकेवाडी, हिवर्डा, अंजनसोंडा परिसरातील आहेत.पोलिसांनी आरोपींकडून सुमारे ३० हजार रुपये किंमतीचे १० ग्रॅम सोन्याचे दागिने तसेच गुन्ह्यात वापरलेल्या दोन मोटारसायकली (एकूण किंमत सुमारे १.५५ लाख रुपये) जप्त केल्या आहेत. या धाडसी कारवाईमुळे गंभीर स्वरूपाचा दरोडा उघडकीस येऊन आरोपींना अवघ्या २४ तासांत अटक करण्यात यश आले आहे.ही उल्लेखनीय कामगिरी पोलीस अधीक्षक रितू खोखर, अपर पोलीस अधीक्षक शफकत आमना आणि उपविभागीय पोलीस अधिकारी भुम विभाग यांच्या मार्गदर्शनाखाली स्थानिक गुन्हे शाखेच्या पथकाने पार पाडली. पकडलेल्या आरोपींचा इतरही गुन्ह्यांमध्ये सहभाग असण्याची शक्यता आहे.
