आरंभ मराठी | धाराशिव
अमेरिकेतील प्रतिष्ठित नॅशनल कॉन्फरन्स ऑफ स्टेट लेजिस्लेचर्स (National Conference of State Legislatures – NCSL) या आंतरराष्ट्रीय परिषदेत सहभागी होण्यासाठी धाराशिव मतदारसंघाचे आमदार कैलास पाटील हे शिष्टमंडळाचे सदस्य म्हणून रविवारी शिकागोकडे रवाना झाले. त्यांच्या समवेत राष्ट्रवादी काँग्रेस (शरदचंद्र पवार) पक्षाचे पंढरपूरचे आमदार तथा त्यांचे भाचे अभिजीत पाटील हे देखील या दौऱ्यात सहभागी झाले आहेत. जगभरातील लोकप्रतिनिधी, धोरणकर्ते, प्रशासकीय अधिकारी आणि विविध क्षेत्रातील तज्ज्ञ एकत्र येणाऱ्या या प्रतिष्ठित परिषदेत सुशासन, कृषी, जलव्यवस्थापन, शिक्षण, तंत्रज्ञान, कृत्रिम बुद्धिमत्ता (AI), पायाभूत सुविधा, ग्रामीण विकास तसेच प्रभावी कायदे निर्मिती अशा विविध महत्त्वाच्या विषयांवर सखोल चर्चा होणार आहे. विविध देशांतील यशस्वी उपक्रम, नाविन्यपूर्ण धोरणे आणि विकासाच्या सर्वोत्तम पद्धतींची देवाणघेवाण या परिषदेत केली जाणार आहे. या परिषदेमुळे महाराष्ट्रातील विकासाला चालना देणाऱ्या संकल्पनांचा अभ्यास करण्याची संधी त्यांना मिळणार असून, विशेषतः ग्रामीण भागातील विकास, शेती, पाणी व्यवस्थापन आणि आधुनिक तंत्रज्ञानाचा वापर यासंदर्भातील अनुभव जाणून घेण्यावर आमदार कैलास पाटील यांचा भर राहणार आहे. तसेच भारतातील यशस्वी विकास मॉडेल आणि उपक्रम जागतिक व्यासपीठावर मांडण्याची संधीही या परिषदेत उपलब्ध होणार आहे.
या अभ्यासदौऱ्याद्वारे नवीन विचार, आधुनिक तंत्रज्ञान, प्रभावी प्रशासन आणि विकासाच्या नव्या संधींचा अभ्यास करून त्याचा लाभ आपल्या मतदारसंघासह राज्याच्या विकासासाठी करून घेण्याचा प्रयत्न करण्यात येणार असल्याचे सांगण्यात आले. हा आंतरराष्ट्रीय अभ्यासदौरा ४ ऑगस्टपर्यंत चालणार आहे.
