आरंभ मराठी | धाराशिव
शिवसेना (उद्धव बाळासाहेब ठाकरे) पक्षाला ‘जय महाराष्ट्र’ करत काही दिवसांपूर्वी उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केलेले धाराशिवचे खासदार ओमराजे निंबाळकर यांनी शिवसेना पक्षप्रमुख उद्धव ठाकरे यांना वाढदिवसानिमित्त समाजमाध्यमावरून जाहीर शुभेच्छा दिल्याने राजकीय वर्तुळात चर्चांना उधाण आले आहे. ओमराजे निंबाळकर यांनी पक्षांतर केल्यानंतर उद्धव ठाकरे यांच्याशी राजकीयदृष्ट्या फारकत घेतली असली, तरी त्यांच्या वाढदिवसानिमित्त सोशल मीडियावरून केलेल्या शुभेच्छा अनेकांच्या नजरा वेधून घेत आहेत. त्यामुळे पक्ष बदलला असला तरी उद्धव ठाकरे यांच्याविषयीचा वैयक्तिक आदर आणि भावनिक नाते कायम असल्याचे दिसून येत आहे.
विशेष म्हणजे, ओमराजे निंबाळकर यांच्याप्रमाणेच परभणीचे खासदार संजय (बंडू) जाधव यांनीही समाजमाध्यमावरून उद्धव ठाकरे यांना वाढदिवसाच्या शुभेच्छा दिल्या आहेत. दोन्ही नेत्यांनी शिंदे गटात प्रवेश केल्यानंतरही उद्धव ठाकरे यांना सार्वजनिकरीत्या शुभेच्छा दिल्याने त्याचे विविध राजकीय अर्थ लावले जात आहेत. महाराष्ट्रातील शिवसेनेतील फूटीनंतर अनेक नेत्यांनी राजकीय भूमिका बदलल्या असल्या, तरी वैयक्तिक संबंध आणि नेतृत्वाबद्दलचा आदर कायम ठेवल्याचे दिसत आहे. दरम्यान, ओमराजे निंबाळकर यांच्या या पोस्टनंतर समाजमाध्यमांवर विविध प्रतिक्रिया उमटत असून समर्थक आणि विरोधकांकडून त्यावर कमेंट केल्या जात आहेत. काहींनी त्यावर तिखट शब्दात प्रतिक्रिया व्यक्त केल्या आहेत.
