आरंभ मराठी / धाराशिव
धाराशिव शहरातील छत्रपती शिवाजी महाराज चौकात उभारण्यात येणाऱ्या 100 फुटी भगवा ध्वज प्रकल्पाच्या कामात झालेल्या विलंबावरून प्रशासन आणि संबंधित यंत्रणांवर नाराजी व्यक्त करत पालकमंत्री प्रताप सरनाईक यांनी कामात अडथळा आणणाऱ्या व्यक्ती व संस्थांवर तात्काळ गुन्हे दाखल करण्याचे निर्देश दिले आहेत.
या प्रकल्पासाठी सुमारे 90 लाख रुपयांचा निधी पालकमंत्री सरनाईक यांनी मंजूर केला होता. 17 सप्टेंबर 2025 रोजी मराठवाडा मुक्ती संग्राम दिनाच्या निमित्ताने या भगव्या ध्वजाचे भूमिपूजन पालकमंत्री प्रताप सरनाईक आणि संघर्षयोद्धा मनोज जरांगे पाटील यांच्या हस्ते करण्यात आले होते. त्यावेळी पुढील सहा महिन्यांत काम पूर्ण करून 19 फेब्रुवारी 2026 रोजी शिवजयंतीनिमित्त उद्घाटन करण्याचे नियोजन करण्यात आले होते.
मात्र, प्रत्यक्षात काम सुरू झाल्यानंतर काही व्यक्ती आणि संघटनांनी या प्रकल्पात अडथळे निर्माण केल्याचे समोर आले. त्यामुळे काम रखडले आणि नियोजित वेळेत पूर्ण होऊ शकले नाही. नंतर उद्घाटनाची तारीख 1 मे ठेवण्यात आली होती, मात्र काम अपूर्ण असल्यामुळे तेही होऊ शकले नाही.
जिल्हा नियोजन समितीच्या बैठकीत हा विषय चर्चेत आला असता, मुख्याधिकारी नीता अंधारे यांनी काही व्यक्तींनी ठेकेदाराला काम थांबवण्यास सांगितल्याचे मान्य केले. यावर पालकमंत्री सरनाईक यांनी तीव्र नाराजी व्यक्त केली आणि अशा अडथळा आणणाऱ्यांविरोधात तात्काळ गुन्हे नोंदवण्याचे आदेश दिले. याचवेळी, धक्कादायक बाब म्हणजे प्रकल्प पूर्ण होण्यापूर्वीच ठेकेदाराला 90 लाखांपैकी तब्बल 57 लाख रुपयांचे बिल अदा करण्यात आल्याची माहिती मुख्याधिकारी अंधारे यांनी दिली.
यामुळे कामाच्या प्रगतीबाबत आणि आर्थिक व्यवहारांबाबत प्रश्नचिन्ह निर्माण झाले आहे. दरम्यान, या प्रकल्पाच्या विलंबामुळे नागरिकांमध्ये नाराजी पसरली असून, प्रशासनाने लवकरात लवकर काम पूर्ण करण्याची मागणी होत आहे.
