तीन दिवसापासून मंदिरातील दर्शन मंडपात संशयास्पद वावर, महिलांचाही समावेश, तुळजापूरमध्ये चौकशी सुरू
आरंभ मराठी / तुळजापूर
कुलस्वामिनी श्री. तुळजाभवानी मातेच्या मंदिरातील दर्शन मंडपाच्या तिसऱ्या मजल्यावर सलग तीन दिवस संशयास्पद हालचाली, संशयास्पद वर्तन करणाऱ्या सात जणांना तुळजापूर पोलिसांनी चौकशीसाठी ताब्यात घेतले आहे.
यामध्ये महिलांचाही समावेश असून, या व्यक्तींची कसून चौकशी करण्यात येत आहे. वारंवार त्याच ठिकाणी येऊन मंदिरात सलग तीन दिवस संशयास्पद हालचाली करणाऱ्या या सात जणांचा उद्देश काय,याची पोलिस चौकशी करत आहेत.
मिळालेल्या माहितीनुसार,
श्री तुळजाभवानी मंदिरात बुधवारी सायंकाळी ५:२७ ते ५:३४ या दरम्यान चार ते पाच व्यक्ती संशयित हालचाली करताना दर्शन मंडपातील तिसऱ्या मजल्यावरील प्रवेशद्वारावर सुरक्षारक्षक शिवाजी उमाप, सुरक्षा फील्ड ऑफिसर बिभिषण माने व सुरक्षा विभाग प्रोजेक्ट मॅनेजर संग्राम पाटील यांना राऊंड चेकिंगला जात असताना आढळून आल्या.
सुरक्षा रक्षकांनी त्या संशयित व्यक्तींची चौकशी केली असता ते फिरवा फिरविची उत्तरे देऊ लागले. सुरक्षा अधिकाऱ्यांनी त्यांना तुम्ही इथे थांबू नका, दर्शन झाले असेल तर तात्काळ मंदिर परिसराबाहेर जा, असे सांगितले व दोन सुरक्षा रक्षक त्यांच्यावरती लक्ष ठेवण्यासाठी पाठवले. त्या संशयित व्यक्ती धर्मदर्शन रांगेतून दर्शनासाठी गेल्या.
त्यानंतर गुरुवारी दुपारी ३:४० ते ३:४६ या दरम्यान पुन्हा एकदा त्याच संशयित व्यक्ती दर्शन मंडपातील तिसऱ्या मजल्याच्या प्रवेशद्वाराला आढळून आल्या. यावेळी सुरक्षा विभाग फील्ड ऑफिसर बिभीषण माने, SISPL चे सुरक्षा निरीक्षक कमलाकर पवार व सुरक्षा रक्षक शिवाजी उमाप हे राऊंड चेकिंगला जात असताना संशयित व्यक्ती निदर्शनास आल्या.
कमलाकर पवार यांनी त्यांना हटकले व तुम्ही इथे कशाला थांबला आहात,असे विचारून त्यांची ओळख विचारली असता ते फिरवाफिरवीची उत्तरे देऊ लागले. त्यांना तेथे थांबू नका, मंदिराच्या बाहेर जा असे सांगितले व तत्काळ ही माहिती मंदिर पोलिस चौकीचे सहायक पोलीस निरीक्षक अर्जुन चौधर व पोलीस कर्मचारी सोनटक्के यांना देण्यात आली.मात्र, तिसऱ्या दिवशी म्हणजे शुक्रवारी सायंकाळी पुन्हा ४:५२ ते ५:०६ या दरम्यान मंदिर परिसरात त्याच संशयित व्यक्ती निदर्शनास आल्या.
यानंतर चार सुरक्षा रक्षकांच्या मदतीने या संशयित व्यक्तींना प्रथम मंदिर पोलिस चौकी येथे नेण्यात आले.त्यानंतर मंदिर पोलिस चौकी पोलिसांच्या सूचनेनुसार त्या संशयित व्यक्तींना तुळजापूर शहर पोलिस चौकी येथे नेण्यात आले. तेथे त्या ७ संशयित व्यक्तींना पुढील कारवाईसाठी पोलिसांच्या ताब्यात देण्यात आले.
या व्यक्तींचा मंदिर परिसरात संशयास्पद वावर असल्याने खळबळ उडाली आहे. पोलिसांनी त्यांची कसून चौकशी सुरू केली असून, चौकशीनंतर नेमका प्रकार समोर येईल.
