प्रतिनिधी / धाराशिव
येथील जिल्हा विधी सेवा प्राधिकरण व श्रीपतराव भोसले ज्यु. कॉलेज यांच्या संयुक्त विद्यमाने ‘विधी साक्षरता शिबिर’ आयोजित करण्यात आले होते. या कार्यक्रमासाठी अध्यक्ष म्हणून जिल्हा विधी सेवा प्राधिकरणचे सचिव वसंत यादव यांची उपस्थिती होती तर प्रथम वर्ग न्यायदंडाधिकारी श्रीमती बी. एम. कोठावळे व महाविद्यालयाचे उपप्राचार्य संतोष घार्गे यांची प्रमुख उपस्थिती होती. यावेळी मान्यवरांनी कायदेविषयक मार्गदर्शन केले.
त्यात ॲड.अभय पाथरूडकर, उपमुख्य लोक अभिरक्षक, ॲड. मोहिनी शिरुरे( सहाय्यक लोक अध्यक्ष), ॲड. विशाखा बंग(सहाय्यक लोक अभिरक्षक), पोलीस उपनिरीक्षक आरती जाधव (सायबर पोलीस), खांडेकर मॅडम यांनी मार्गदर्शनपर आपले विचार मांडले. कार्यक्रमाच्या सुरुवातीला ॲड. अभय पाथरूडकर यांनी चाइल्ड ट्राफिकिंग, बालमजुरी, बालकांचे होणारे शोषण, कायदे याविषयी माहिती दिली. पोलीस उपनिरीक्षक आरती जाधव यांनी सायबर गुन्हे, सोशल मीडियाच्या मार्फत होणारी फसवणूक, सेक्सटोर्शन सारख्या गंभीर गुन्ह्याला लोक कसे बळी पडतात, याविषयी मार्गदर्शन केले. ॲड. मोहिनी शिरुरे यांनी बालविवाह व त्यासाठी वेळोवेळी झालेले कायदे, बालविवाह घडवून आणणाऱ्यास शिक्षेची तरतूद, बालविवाहाची कारणे याची माहिती दिली. ॲड. विशाखा बंग यांनी २०१२ मध्ये अल्पवयीन मुलांसाठी करण्यात आलेल्या ‘पोक्सो’ या कायद्याविषयी सविस्तर माहिती दिली. त्यांनी या कायद्याअंतर्गत मुलांना लैंगिक शोषणाविरुद्ध कोणते अधिकार मिळतात, कोणत्या कृती लैंगिक शोषणामध्ये मोडतात याविषयी मार्गदर्शन केले.
यावेळी मुलांनी द्विअर्थी बोलणे, वाईट स्पर्श, सुरक्षित व असुरक्षित जागा ओळखाव्यात असा सल्ला त्यांनी दिला. तसेच खांडेकर यांनी सोशल मीडियाच्या माध्यमातून होणारी आर्थिक फसवणूक याविषयी माहिती दिली. कार्यक्रमाचे अध्यक्ष वसंत श्री. यादव यांनी विधी साक्षरता विषयी मुलांना मार्गदर्शन करत अध्यक्षीय समारोप केला. यावेळी कला, वाणिज्य व विज्ञान शाखेतील सर्व प्राध्यापक वर्ग उपस्थित होता. कार्यक्रमाचे सूत्रसंचालन कला व वाणिज्य विभाग प्रमुख, प्रा. एन. आर. नन्नवरे यांनी केले तर आभार प्रा. मोहिते के. बी.यांनी मानले. या कार्यक्रमासाठी संस्थेचे अध्यक्ष सुधीर पाटील, कॉलेजचे प्राचार्य साहेबराव देशमुख, प्रशासकीय अधिकारी आदित्य पाटील यांचे सहकार्य लाभले.
