आरंभ मराठी / धाराशिव
धाराशिव जिल्हा पोलीस दलाच्या स्थानिक गुन्हे शाखेने अवैध शस्त्र बाळगणाऱ्यांविरोधात केलेल्या कारवाईत एका आरोपीस गावठी कट्टा व दोन जिवंत काडतुसांसह ताब्यात घेतले. या कारवाईमुळे अवैध शस्त्र बाळगणाऱ्यांमध्ये खळबळ उडाली आहे.
पोलीस अधीक्षक रितु खोखर, अपर पोलीस अधीक्षक सचिन पांडकर यांच्या मार्गदर्शनाखाली तसेच स्थानिक गुन्हे शाखेचे पोलीस निरीक्षक विनोद इज्जपवार यांच्या आदेशानुसार अवैध शस्त्र बाळगणाऱ्या व्यक्तीविरुद्ध विशेष मोहीम राबविण्यात येत आहे. दिनांक १२ जून २०२६ रोजी स्थानिक गुन्हे शाखेचे पथक पेट्रोलिंग करीत असताना येरमाळा चौक परिसरात गोपनीय माहिती मिळाली. त्यानुसार शाम शिवाजी काळे (वय ३२, रा. झगडे गल्ली, भूम) हा आंदोरा येथे जात पंचायतसाठी आला असून, तो हॉटेल निसर्गसमोर थांबलेला आहे व त्याच्याकडे गावठी कट्टा असल्याची माहिती पथकाला मिळाली.
माहितीची खातरजमा करून पथकाने तत्काळ घटनास्थळी धाव घेतली. हॉटेल निसर्गसमोर संशयित व्यक्ती दिसताच पोलिसांनी शिताफीने त्याला ताब्यात घेतले. अंगझडतीदरम्यान त्याच्या कंबरेला खोवलेला लाकडी पिस्टल ग्रीप असलेला लोखंडी गावठी कट्टा तसेच पँटच्या खिशात दोन जिवंत काडतुसे आढळून आली. जप्त करण्यात आलेल्या मुद्देमालाची एकूण किंमत सुमारे ४६ हजार रुपये असल्याचे पोलिसांनी सांगितले.
आरोपीची वैद्यकीय तपासणी करून त्याच्याविरुद्ध कळंब पोलीस ठाणे येथे अवैधरित्या शस्त्र बाळगल्याप्रकरणी गुन्हा दाखल करण्यात आला असून पुढील तपासासाठी त्याला कळंब पोलीस ठाण्याच्या ताब्यात देण्यात आले आहे. ही कारवाई पोलीस निरीक्षक विनोद इज्जपवार यांच्या नेतृत्वाखाली सहाय्यक पोलीस निरीक्षक सचिन खटके, पोलीस हवालदार विनोद जानराव, नितीन जाधवर, पोलीस नाईक बबन जाधवर तसेच रोहित दंडनाईक आदींच्या पथकाने यशस्वीरीत्या पार पाडली.
