धक्कादायक प्रकार.. गावावर ४ दिवसांपासून ड्रोनच्या घिरट्या, चोरट्यांचा डोळा की भलतेच काही घडणार..? गावकरी भयभीत, घरफोड्यांनंतर ग्रामस्थांची झोप उडाली

जगदीश गवळी / आरंभ मराठीगेल्या ४ दिवसांपासून अज्ञात ड्रोन कॅमेऱ्यांच्या गावावर रहस्यमय घिरट्या आणि गावकऱ्यांच्या मनात उठलेले भीतीचे वादळ यामुळे संपूर्ण तालुक्यात एकच खळबळ उडाली आहे. ड्रोनच्या घिरट्यांचा ना पोलिसांना अंदाज ना गावकऱ्यांना.त्यामुळे भीतीचे सावट अधिक गडद झाले आहे.

संपूर्ण गाव भीतीच्या छायेत सापडले आहे. रात्रीच्या काळोखात गावावर फिरणारे हे ड्रोन नेमके कोणाचे, याचा शोध लागत नसल्याने नागरिकांमध्ये प्रचंड घबराट पसरली आहे.कळंब तालुक्यातील घारगाव येथे गेल्या आठवड्यात गावात गणेश बाबुराव कुंभकर्ण यांच्या घरी घरफोडी करून चोरट्यांनी तीन तोळे सोने दागिने व 15 हजार रोकड लंपास केली.

तसेच कल्याण कुंभकर्ण,हनुमंत कुंभकर्ण व प्रकाश तापडिया यांच्या घरात चोरीचा अयशस्वी प्रयत्न झाला.अनेक घरांची कुलपे तोडून चोरट्यांनी धुमाकूळ घातला होता. त्या घटनेची भीती अद्याप कायम असतानाच आता ड्रोनच्या माध्यमातून गावाची रेकी सुरू असल्याचा संशय व्यक्त केला जात आहे. त्यामुळे चोरट्यांनी नवी शक्कल लढवली का, असा प्रश्न ग्रामस्थ विचारत आहेत.

ग्रामस्थ दिनकर घाटुळे म्हणाले की, मध्यरात्रीच्या सुमारास आकाशात प्रकाशझोतासह ड्रोन फिरताना दिसत आहे. त्यामुळे अनेक कुटुंबांनी रात्रभर जागून पहारा देण्यास सुरुवात केली आहे. महिलांमध्ये, वृद्धांमध्ये आणि लहान मुलांमध्येही भीतीचे वातावरण निर्माण झाले आहे.

पोलिसांना थांगपत्ता लागेना,

या संदर्भात शिराढोण पोलिसांना माहिती देण्यात आली असली तरी अद्याप कोणताही ठोस मागमूस लागलेला नाही. त्यामुळे गावकऱ्यांनी पोलिसांनी तातडीने चौकशी करून गावात नियमित गस्त वाढवावी, तसेच ड्रोन उडवणाऱ्यांचा शोध घ्यावा, अशी जोरदार मागणी केली आहे.
घारगावातील या प्रकारामुळे ग्रामीण भागातही गुन्हेगारीचे नवे तंत्र समोर येत असल्याची चर्चा सुरू झाली असून, नागरिकांच्या सुरक्षेचा मुद्दा पुन्हा एकदा ऐरणीवर आला आहे.

काय म्हणाले गावकरी..

यासंदर्भात आरंभ मराठीने काही गावकऱ्यांशी संपर्क साधला. माजी सभापती दत्तात्रय साळुंखे म्हणाले की,गावामध्ये एकाच वेळी दोन तीन ड्रोन फिरत असून गावकऱ्यात भीतीचे वातावरण आहे. प्रशासनाने याचा छडा लावावा.
तर यासंदर्भात शिराढोण पोलीस ठाण्याचे सहाय्यक पोलीस निरीक्षक कोळेकर यांच्याशी संपर्क साधला असता यासंदर्भात गावकऱ्यांच्या तक्रारी आल्या बाबत सांगण्यात आले . पोलीस प्रशासनाकडून आज या गावांमध्ये गस्त वाढविण्यात आल्याची माहिती देण्यात आली.