आरंभ मराठी | धाराशिव
धाराशिव शहराच्या सांस्कृतिक विकासासाठी महत्त्वाचा निर्णय घेत उपमुख्यमंत्री एकनाथ शिंदे यांनी दिलेला शब्द अवघ्या २४ तासांत पाळत छत्रपती शिवाजी महाराज नाट्यगृहाच्या दुरुस्तीसाठी तब्बल ५ कोटी रुपयांचा निधी मंजूर केला आहे. यामुळे त्यांच्या कार्यतत्परतेची पुन्हा एकदा प्रचिती आली आहे.
रविवारी धाराशिव दौऱ्यावर आलेल्या एकनाथ शिंदे यांनी पत्रकार संघाच्या समारंभादरम्यान शहरातील छत्रपती शिवाजी महाराज नाट्यगृहाच्या दुरुस्तीसाठी निधी देण्याबाबत सकारात्मक भूमिका दर्शवली होती. यावेळी अखिल भारतीय मराठी नाट्य परिषदेच्या धाराशिव शाखेने निवेदन सादर करून नाट्यगृहासाठी अडीच कोटी रुपयांची मागणी केली होती.
कार्यकारीणी सदस्य विशाल शिंगाडे यांनी दिलेल्या या निवेदनाचा उल्लेख शिंदे यांनी आपल्या भाषणात केला होता. यावेळी शिंदे यांनी केवळ अडीच कोटी नव्हे, तर थेट ५ कोटी रुपये मंजूर करून शासन निर्णय काढण्याचा शब्द दिला होता. विशेष म्हणजे, हा शब्द त्यांनी आज (दि.१३) प्रत्यक्षात उतरवत नगर विकास विभागामार्फत शासन निर्णय जारी केला असून, धाराशिव नगरपालिकेला वैशिष्ट्यपूर्ण योजनेअंतर्गत निधी मंजूर करण्यात आला आहे.
धाराशिवमध्ये २००९ साली विधानसभा निवडणुकीपूर्वी मध्यवर्ती ठिकाणी भव्य व सुसज्ज नाट्यगृह उभारण्यात आले होते. मात्र, पायाभूत सुविधांचा अभाव असल्यामुळे ही वास्तू अनेक वर्षे दुर्लक्षित अवस्थेत होती. नाट्यगृहात लाईट, पंखे, स्वच्छतागृह यांसारख्या मूलभूत सुविधांचा अभाव असल्याने येथे होणाऱ्या सांस्कृतिक कार्यक्रमांमध्ये अडथळे येत होते.
गेल्या अनेक वर्षांपासून या नाट्यगृहाच्या विकासाची मागणी होत होती.
मात्र निधीअभावी नगरपालिकेकडून याकडे दुर्लक्ष होत असल्याची भावना नागरिकांमध्ये होती. आता राज्य शासनाकडून निधी मंजूर झाल्याने नाट्यगृहात आवश्यक सुविधा उपलब्ध होऊन दर्जेदार सांस्कृतिक कार्यक्रमांना चालना मिळेल, अशी अपेक्षा व्यक्त होत आहे. दरम्यान, निधी मंजूर केल्याबद्दल अखिल भारतीय मराठी नाट्य परिषद धाराशिव शाखा तसेच कला प्रेमी नागरिकांनी उपमुख्यमंत्री एकनाथ शिंदे यांचे आभार मानले आहेत.
