उबाठा गटाचे समन्वयक ॲड. संजय भोरे यांचा सनसनाटी आरोप,
धाराशिवमध्ये उपमुख्यमंत्री शिंदेंच्या दौऱ्यात गोंधळ
आरंभ मराठी / धाराशिव :
उद्धव ठाकरे भेटत नाहीत, असे रडगाणे गाणारे आज स्वतःच्या कार्यकर्त्यांना भेटायलाच घाबरत आहेत का? असा थेट सवाल शिवसेना (उद्धव बाळासाहेब ठाकरे) पक्षाचे युवासेना जिल्हा समन्वयक ॲड. संजय भोरे यांनी उपस्थित केला आहे. धाराशिव दौऱ्याच्या पार्श्वभूमीवर घडलेल्या घटनांवरून त्यांनी मुख्यमंत्री एकनाथ शिंदे यांच्यावर जोरदार टीका केली.
धर्मवीर चित्रपटात स्वतःचे धाडस दाखवण्यासाठी नक्षलवाद्यांनाही न घाबरणारा सीन दाखवणारे शिंदे प्रत्यक्षात आपल्या कार्यकर्त्यांनाच कधीपासून घाबरू लागले? असा सवाल भोरे यांनी उपस्थित केला. पालकमंत्री प्रताप सरनाईक यांच्या दौऱ्यात झालेल्या गोंधळाचे कारण देत खबरदारी म्हणून काही कार्यकर्त्यांना पहाटे घरातून उचलून नजरकैदेत ठेवण्यात आल्याचे प्रकार माध्यमांतून समोर आले आहेत, यावर त्यांनी तीव्र नाराजी व्यक्त केली.
भोरे म्हणाले, जर भीती नाहीच, तर धाराशिव दौऱ्याआधी अविनाश खापे, नितीन पाटील, प्रवक्ता योगेश केदार यांच्यासह निष्ठावान कार्यकर्त्यांना नजरकैदेत ठेवण्याचे ‘पाप’ कशासाठी करण्यात आले?
पुढे टीका करताना भोरे यांनी सरकारच्या कार्यपद्धतीवर गंभीर आरोप केला. निजामी राजवटीत जशा प्रकारे दडपशाही करून जनतेचा आवाज दाबला जात होता, तसाच प्रकार आज धाराशिवमध्ये दिसत आहे. लोकशाहीत संवादाला स्थान असते; मात्र येथे ‘नजरकैद’ आणि ‘दहशत’ यांनाच महत्त्व दिले जात आहे. पोलिसांच्या खांद्यावर बंदूक ठेवून चालवली जाणारी ही यंत्रणा म्हणजे नव्या स्वरूपातील ‘रझाकारी’ मानसिकता नाही का? असा सवाल त्यांनी उपस्थित केला.
शिवसैनिकांचा अपमान, भाजप आमदारपुत्राला ‘रेड कार्पेट’
शिवसैनिकांच्या वागणुकीवरही भोरे यांनी तीव्र शब्दांत टीका केली. “स्वतःला शिवसैनिक म्हणवून घेणारे आणि स्वाभिमानासाठी उठाव केला असे सांगणारे शिंदे एकीकडे आपल्या कार्यकर्त्यांनाच नजरकैदेत टाकत आहेत. विमानतळावर स्वागतासाठी आलेल्या कार्यकर्त्यांना अडवले जात आहे, तर दुसरीकडे भाजप आमदारपुत्राला ‘रेड कार्पेट’ आणि ‘डायरेक्ट एन्ट्री’ दिली जाते. हाच का शिवसैनिकांचा स्वाभिमान?” असा प्रश्न त्यांनी उपस्थित केला.
सत्तेसाठी लाचारी पत्करलेले हे नेतृत्व जनतेची भीती घालवण्याऐवजी स्वतःच्या कार्यकर्त्यांनाच घाबरवण्याचे काम करत आहे, अशा शब्दांत ॲड. संजय भोरे यांनी मुख्यमंत्री शिंदे यांच्यावर जोरदार प्रहार केला.
