आरंभ मराठी / धाराशिव
धाराशिव शहरात शहर स्वच्छ करणाऱ्या नगरपालिकेच्या महिला कर्मचाऱ्याला भरधाव कारने जोराची धडक दिल्यामुळे अपघातात महिलेचा दुर्दैवी मृत्यू झाला. मंगल मेसू गवळी (वय-५२ रा. बेंबळी ता. जि. धाराशिव) असे मृत्यू झालेल्या महिलेचे नाव आहे.
आज सकाळी साडेअकरा वाजण्याच्या सुमारास ख्वाजा नगर परिसरातील एम. के. फंक्शन हॉल समोरील रस्त्यावर तुळजापूरकडे जाणाऱ्या रस्त्यावर मंगल गवळी या झाडू मारत होत्या.
त्यावेळी नेक्सॉन कंपनीची गाडी ( 24 BH 0215 L) तुळजापूरच्या दिशेने भरधाव जात होती. या गाडीने रस्त्याच्या कडेला झाडू मारणाऱ्या मंगल गवळी यांना जोराची धडक दिली. या धडकेमुळे मंगल गवळी यांच्या डोक्याला गंभीर दुखापत झाली. धडक जोराची असल्यामुळे त्यांचा जागीच मृत्यू झाला.
यावेळी गाडी चालकाने पळून जाण्याचा प्रयत्न केला मात्र तिथे उपस्थित असलेल्या इतर महिला स्वच्छता कर्मचाऱ्यांनी गाडी चालकाला अडवून रस्त्यावरच चोप दिला. सध्या धडक दिलेली गाडी पोलिसांनी शहर पोलीस ठाण्यात आणली असून, चालकावर गुन्हा दाखल करण्याची प्रक्रिया सुरू आहे.
