आरंभ मराठी / धाराशिव
शक्तीपीठ महामार्गाची संयुक्त मोजणी करत असताना तुळजापूर तालुक्यातील वानेवाडी शिवारात बाधित शेतकऱ्याने मोजणी करणाऱ्या अधिकाऱ्यांसमोरच विषप्राशन करून आत्महत्या करण्याचा प्रयत्न केला आहे. दत्तात्रय सावंत ( वय-५२) असे विषप्राशन करणाऱ्या शेतकऱ्याचे नाव आहे.
विशेष म्हणजे शेतकऱ्यावर उपचार सुरू नसून शेतकरी शेतातच पडून राहिला आहे. जोपर्यंत मोजणी करणारे अधिकारी शेतातून बाहेर जात नाहीत तोपर्यंत मी उपचार घेणार नाही अशी भूमिका विषप्राशन करणारे शेतकरी
दत्तात्रय सावंत यांनी घेतली आहे.
काल वानेवाडी शिवारात बाधित शेतकऱ्यांनी शक्तीपीठ महामार्गाची मोजणी करण्यास विरोध केला होता. त्यानंतर अधिकारी आजही पोलिसांचा मोठा फौजफाटा घेऊन वानेवाडी शिवारात आले होते. त्यावेळी कालप्रमाणे आजही शेतकऱ्यांनी मोजणी करण्यास तीव्र विरोध केला.
त्यावेळी पोलिसांनी बळाचा वापर करून शेतकऱ्यांना हुसकावून लावण्याचा प्रयत्न केला. त्याचवेळी दत्तात्रय सावंत यांनी उपस्थित अधिकाऱ्यांच्या समोर विष प्राशन केले.
शक्तीपीठ महामार्गाच्या मोजणीचा प्रश्न दिवसेंदिवस गंभीर बनत चालला असून, शेतकऱ्यांचा विरोध वाढत चालला आहे. सध्या आमदार कैलास पाटील हे बाधित शेतकऱ्यांसोबत जिल्हाधिकारी कीर्ती किरण पुजार यांची भेट घेण्यास गेले आहेत.
