आरंभ मराठी / धाराशिव
धाराशिव शहरातील डॉ. बापूजी साळुंखे विधी महाविद्यालयात बुधवारी सकाळी साडेअकराच्या सुमारास विद्यार्थिनी आणि विद्यार्थ्यामध्ये किरकोळ कारणावरून झालेल्या वादाचे पडसाद गुरुवारी महाविद्यालयात उमटले. या वादानंतर विद्यार्थिनीने तिच्या पतीसह नातेवाईकांना महाविद्यालयात बोलावून घेतल्याचा आरोप असून, त्यानंतर संबंधित नातेवाईकांनी एका विद्यार्थ्याला वर्गातच जबर मारहाण केल्याचे सांगण्यात येत आहे. या मारहाणीचे व्हिडिओ देखील समाजमाध्यमावर व्हायरल झाले.
या घटनेमुळे महाविद्यालयात काही काळ तणावाचे वातावरण निर्माण झाले. मिळालेल्या माहितीनुसार, बुधवारी सकाळी साडेअकराच्या सुमारास महाविद्यालयातील एका विद्यार्थिनीचा आणि विद्यार्थ्याचा किरकोळ कारणावरून वाद झाला. त्यानंतर विद्यार्थिनीने तिच्या पतीसह काही नातेवाईकांना महाविद्यालयात बोलावून घेतले. महाविद्यालयात आल्यानंतर संबंधित व्यक्तींनी त्या विद्यार्थ्याला वर्गातच मारहाण केली. एवढेच नव्हे तर विद्यार्थ्याला जिन्यावरून ओढत आणून तीन ते चार जणांनी मारहाण केल्याचेही सांगण्यात येत आहे. या प्रकाराची माहिती मिळताच महाविद्यालयाचे प्राचार्य कायला कृष्णमूर्ती यांनी प्रकरणाची गंभीर दखल घेतली. विद्यार्थ्याला मारहाण करणाऱ्या व्यक्तींविरोधात कारवाई करण्याची मागणी करणारे लिखित पत्र आनंदनगर पोलीस ठाण्यात देण्यात आले.
दरम्यान, या घटनेच्या निषेधार्थ गुरुवारी सकाळपासून विद्यार्थ्यांनी आक्रमक भूमिका घेतली. सकाळी साडेआठ वाजल्यापासून सर्व विद्यार्थी महाविद्यालयाच्या आवारात ठिय्या मांडून बसले. संबंधित व्यक्तींविरोधात गुन्हा दाखल होत नाही, तोपर्यंत महाविद्यालयाचे कामकाज सुरू करू दिले जाणार नाही, अशी भूमिका विद्यार्थ्यांनी घेतली. त्यामुळे गुरुवारी दिवसभर महाविद्यालयाचे नियमित कामकाज ठप्प राहिले.
विद्यार्थ्यांच्या आंदोलनाची दखल घेत प्राचार्यांनी आनंदनगर पोलीस ठाण्याच्या पोलिसांना महाविद्यालयात बोलावून घेतले. यावेळी विद्यार्थ्याला मारहाण होत असल्याचे व्हिडिओ पोलिसांना दाखवण्यात आले. पोलिसांनी संबंधित व्हिडिओची पाहणी करून प्रकरणात आवश्यक ती कायदेशीर कारवाई करण्याची भूमिका घेतली आहे.
दरम्यान, या प्रकरणी अद्याप गुन्हा दाखल झालेला नसला तरी महाविद्यालय प्रशासनाकडून मारहाण करणाऱ्या व्यक्तींविरोधात गुन्हा दाखल करण्यासंदर्भातील पत्र आनंदनगर पोलीस ठाण्यात देण्यात आले आहे. सध्या या प्रकरणात गुन्हा दाखल करण्याची प्रक्रिया सुरू असल्याची माहिती आहे. या घटनेमुळे विधी महाविद्यालयातील विद्यार्थ्यांच्या सुरक्षेचा प्रश्न ऐरणीवर आला असून, महाविद्यालय परिसरात बाहेरील व्यक्तींना प्रवेश कसा मिळाला आणि विद्यार्थ्याला वर्गात मारहाण होईपर्यंत परिस्थिती नियंत्रणात का आणता आली नाही, याबाबतही चर्चा सुरू झाली आहे.
