युवा नेते आनंद पाटील यांच्या मागणीवरून पालकमंत्री प्रताप सरनाईक यांची सकारात्मक भूमिका
आरंभ मराठी / धाराशिव
धाराशिव जिल्ह्याला नूतन पालकमंत्री म्हणून राज्याचे परिवहनमंत्री प्रताप सरनाईक यांची वर्णी लागली आहे. प्रताप सरनाईक हे ठाणे जिल्ह्यातील ओवळा माजिवडा मतदारसंघाचे प्रतिनिधित्व करतात. पालकमंत्रीपद मिळाल्यानंतर त्यांचे अद्याप जिल्ह्यात आगमन झाले नाही, मात्र त्यांनी जिल्ह्याला मोठं गिफ्ट देण्याचे संकेत दिले आहेत.त्यांच्याकडे असलेल्या परिवहन महामंडळाच्या खात्याच्या संदर्भात युवा सेनेचे नेते, जिल्हा परिषदेचे माजी सदस्य आनंद पाटील यांनी परिस्थिती अवगत केली. त्यांनी महामंडळाच्या एकूण मोडकळीला आलेल्या बसची अवस्था मांडून जिल्ह्यासाठी 100 नवीन इलेक्ट्रिक बस देण्याची मागणी केली होती.त्यानंतर पालकमंत्री सरनाईक यांनी ही बाब सकारात्मक पद्धतीने मान्य करून महामंडळाच्या कार्यकारी अधिकाऱ्यांकडे याबाबत निर्णय घेण्याबाबत निर्देश दिले आहेत.लवकरच जिल्ह्याला 20 इलेक्ट्रिक बस मिळण्याची शक्यता आहे.
आनंद पाटील यांनी मंगळवारी पालकमंत्री प्रताप सरनाईक यांची मुंबईत जाऊन भेट घेतली तसेच त्यांचा सत्कार केला. त्यानंतर आनंद पाटील यांनी जिल्ह्यातील एकूण रखडलेल्या बस स्थानकाच्या कामांची माहिती दिली. धाराशिव, लोहारा, तुळजापूर येथील बस स्थानकाच्या संदर्भात चर्चा केल्यानंतर जिल्ह्यात कार्यरत असलेल्या एसटी कशा नादुरुस्त आहेत आणि त्याचा प्रवाशी सेवेवर कसा परिणाम होतो आहे,याची सविस्तर माहिती अवगत केली.
जिल्ह्यावर एस टी सेवेच्या बाबतीत कायम अन्याय होत असून, चांगल्या सेवा मिळण्यासाठी महामंडळाने प्रयत्न करावेत,अशी अपेक्षा व्यक्त केली. तसेच जिल्ह्यातील अंतर्गत प्रवाशी सेवेसाठी किमान 100 नवीन इलेक्ट्रिक बस मिळाव्यात,अशी मागणी केली. त्यावर पालकमंत्री सरनाईक यांनी सकारात्मक विचार करून खात्याच्या एमडीना याबाबत निर्देश दिले आहेत.त्यामुळे पालकमंत्री म्हणून सरनाईक जिल्ह्याला लवकरच नवीन इलेक्ट्रिक बसच्या माध्यमातून गिफ्ट देतील,अशी अपेक्षा आहे.
काय आहे आनंद पाटील यांची मागणी ?
आनंद पाटील यांनी दिलेल्या पत्रात म्हटले आहे की, जिल्हयातील अंतर्गत वाहतुकीने धाराशिव शहर हे लोकांनी गजबजलेले शहर आहे. रोज धाराशिव शहरात आजुबाजुच्या खेडेगावातुन हजारो लोकांची ये-जा होत असते. आणि प्रामुख्याने खेडे गावातील लोक हे परीवहन विभागाच्या गाड्यांचा जास्त वापर करत असतात. त्यामुळे जिल्हात अंतर्गत वाहतुकीसाठी चांगल्या बसेसची आवश्यकता आहे. त्या तुलनेत धाराशिव परिवहन विभागाच्या ज्या बसेस आहेत त्या अत्यंत निकृष्ट दर्जाच्या आहेत व खराब अशा आहेत. परिवहन विभागाच्या बसेस या कित्येकदा रस्त्यामध्येच बंद पडलेल्या आढळतात.त्याचा प्रचंड प्रमाणात त्रास व मनस्ताप हा प्रवाशांना होताना दिसतो तसेच बसचे चालक-वाहक यांनाही या वाहन सततच्या बंद पाडण्याचा त्रासाला सामोरे जावे लागते.
बऱ्याचवेळा प्रवासी हे खाजगी वाहनांना प्राधान्य देताना दिसतात आणि अशा खाजगी वाहनांमुळे अपघातही होण्याचे प्रमाण वाढले आहे. त्यामुळे आपल्या मार्फत माझ्या पत्राची दखल घेवून धाराशिव परिवहन विभागाला 100 इलेक्ट्रिक बसेस मिळण्यात याव्या ही विनंती. या मागणीवरून पालकमंत्री प्रताप सरनाईक यांनी खात्याच्या अधिकाऱ्यांना अबाबत विचार करण्याचे निर्देश दिले आहेत.
