आरंभ मराठी / धाराशिव
ऑनलाईन नोकरीच्या आमिषाला बळी पाडून एका तरुणाची आणि त्याच्या वडिलांची तब्बल साडेचार लाखांची ऑनलाइन फसवणूक करण्यात आल्याची घटना उघडकीस आली आहे. धाराशिव तालुक्यातील कौडगाव येथील तरुणाची तब्बल ४ लाख ४८ हजार ३१० रुपयांची सायबर फसवणूक झाल्याची घटना उघडकीस आली आहे.
या प्रकरणी धाराशिव सायबर पोलीस ठाण्यात अज्ञात आरोपींविरुद्ध गुन्हा दाखल करण्यात आला असून सायबर पोलीस पुढील तपास करीत आहेत. सायबर पोलीसांनी दिलेल्या माहितीनुसार, फिर्यादी भालचंद्र नरहरी गंगावणे (वय ६३ वर्षे, रा. कौडगाव, ता. जि. धाराशिव) यांच्या मुलास अज्ञात मोबाईल क्रमांक 8757344421 व 8898678952 वरून संपर्क साधण्यात आला होता.
संबंधित अज्ञात व्यक्तींनी त्यांना ‘the royal mint7758’ नावाच्या टेलीग्राम ग्रुपमध्ये अॅड केले. या ग्रुपद्वारे ऑनलाईन नोकरीची संधी उपलब्ध करून देण्याचे आमिष दाखविण्यात आले. यानंतर आरोपींनी विविध टास्क पूर्ण करण्याच्या नावाखाली तसेच नोकरी निश्चित करण्याचे कारण सांगून वेळोवेळी वेगवेगळ्या खात्यांमध्ये पैसे भरण्यास सांगितले.
नोकरी मिळेल व भरलेले पैसे परत मोबदल्यासह मिळतील, असे आश्वासन देत आरोपींनी फिर्यादी व त्यांच्या मुलाकडून एकूण ४,४८,३१० रुपये भरून घेतले. मात्र पैसे भरल्यानंतर आरोपींनी कोणताही मोबदला दिला नाही किंवा नोकरीही उपलब्ध करून दिली नाही. उलट संपर्क टाळत फसवणूक केल्याचे लक्षात आल्यानंतर फिर्यादी यांनी सायबर पोलीस ठाण्यात धाव घेतली.
याबाबत भालचंद्र गंगावणे यांनी दिलेल्या प्रथम खबरेवरून धाराशिव सायबर पोलीस ठाण्यात अज्ञात आरोपींविरुद्ध भारतीय न्याय संहिता (BNS) कलम ३१८(४) अन्वये गुन्हा दाखल करण्यात आला आहे.
सायबर पोलीसांनी नागरिकांना आवाहन केले आहे की, सोशल मीडिया, टेलीग्राम, व्हॉट्सअॅप किंवा इतर ऑनलाईन प्लॅटफॉर्मवर मिळणाऱ्या नोकरीच्या आमिषांना बळी पडू नये.
कोणत्याही अनोळखी व्यक्ती किंवा ग्रुपच्या सांगण्यावरून पैसे भरू नयेत. नोकरीसाठी पैसे मागितले जात असल्यास ती फसवणूक असण्याची शक्यता जास्त असते. अशा संशयास्पद प्रकारांची त्वरित सायबर पोलीसांकडे तक्रार करावी, असेही आवाहन करण्यात आले आहे.
