म्हणाले, लोकसभेच्या एका पराभवानंतर कुवत कळाली
प्रतिनिधी / धाराशिव
कुवत काय आहे, हे लोकसभेच्या एका पराभवानंतर जिल्ह्याला दिसून आले. दुसर्याला बोलण्याआधी आपण आत्मपरीक्षण करा.पाच वर्षापुर्वी आपण कोणाचे होता, आज कोणाचे आहात व भविष्यात अजुन कोणाचे व्हाल, याची खात्री नसणार्यांनी मला बोलु नये,असा टोला खासदार ओमराजे निंबाळकर यांनी आमदार राणा जगजितसिंह पाटील यांना लगावला.
आमदार राणा जगजितसिंह पाटील यांनी शनिवारी पत्रकार परिषदेत नाव न घेता खासदार ओमराजे यांच्यावर टीका केली होती. त्याला खासदार ओमराजे यांनी प्रत्युत्तर दिले आहे. खासदार ओमराजे यांनी म्हटले आहे की, भुसंपादनाच्या प्रक्रियेत आपले कमीशन एजंट धोरण राबवण्यात अडथळा आल्याने एवढा पोटशुळ सुटणे आम्ही समजू शकतो. शेतकरी प्रश्न विचारु लागले आहेत, त्यांना उत्तर द्यायचे सोडुन आमच्यावर टिका करण्याने काय साध्य होणार आहे. आमची कुवत काढणार्यांनी ४० वर्षात जिल्ह्याला दारिद्र्य यादीत पोहचवले. अजुनही तुमचे पोट भरलेले नाही. शेतकऱ्यांच्या हक्काच्या जमीनीतही तुमचा स्वार्थ लपुन राहिलेला नाही. त्यात आता माझ्या बाजुच्या लोकांकडे लक्ष देण्याची आवश्यकता तुमच्यासारख्यांना भासु लागली याचे मी स्वागतच करतो. विमा प्रकरणी वारंवार पुरावे दिलेत व त्यावर थेट बोलायचे सोडुन असे मोघम बोलुन आपल्या बुध्दीचे प्रदर्शन कशाला दाखवताय, असा सवाल ओमराजेंनी केला. आम्ही भाषणात काय बोललो यांचे टिपण घेताय म्हणजे आता तुमच्या पक्षाला विचारुन आम्ही बोलायच का? या असल्या धमकीला घाबरणारा शिवसैनिक नाही, हे त्यांनी लक्षात ठेवावे, असा इशारा ओमराजे यांनी दिला. दिल्लीत कशाला गेला होता, हे सुध्दा आम्हाला ठाऊक आहे, ते पण योग्यवेळी नक्कीच सांगू , निवडणुक लढायला तर तुम्ही कायमच तत्पर असतात. दुसर्या कोणाला उमेदवारी मिळु नये यासाठी तुमची धडपड सर्वांच्याच लक्षात येत आहे. पक्ष बदलला म्हणजे आत्मकेंद्री स्वभाव बदलत नसतो, असाही टोला खासदार ओमराजे यांनी लगावला आहे.
