सरकारच्या विरोधात समाजाचा रोष
प्रतिनिधी / वाशी
मराठा समाजाला आरक्षण मिळत नसल्याने उद्विग्नेतून एका तरुणाने गळफास घेऊन आत्महत्या केली. सदरील घटना तालुक्यातील बावी येथे शुक्रवारी (दि.19) रोजी पहाटे पाच च्या सुमारास घडली. अत्महत्या करणाऱ्या तरुणाचे नाव राजकुमार लहू शिंदे (२३) असे आहे.मराठा आरक्षणासाठी दिवसेंदिवस आत्महत्या वाढतच आहेत, त्यामुळे सरकारने तातडीने आरक्षण जाहीर करावे अशी मागणी होत आहे.
गुरुवारी रात्री शेतात झोपायला गेल्यानंतर शुक्रवार रोजी पहाटे शेतातील पत्र्याच्या शेडमध्ये गळफास लावून राजकुमार यांनी आत्महत्या केली. मराठा आरक्षण मिळत नसल्याचे कारण देत आरक्षणामुळे आत्महत्या करत असल्याची चिठ्ठी लिहून राजकुमार याने स्वतःचे जीवन संपवले. मराठा आरक्षण आंदोलनाचा निर्णायक टप्पा शनिवारपासून सुरू होत आहे. तत्पूर्वी अशी घटना घडल्याने हळहळ व्यक्त होत आहे.यामुळे सरकारविरोधात संताप व्यक्त केला जात आहे.
