आरंभ मराठी / धाराशिव
धाराशिव शहरातील जिजाऊ चौक येथील पोलीस आऊट पोस्ट चौकीत नियुक्त कर्मचारी नियमितपणे उपस्थित राहत नसल्याचा गंभीर प्रकार समोर आला होता. त्यानंतर दैनिक आरंभ मराठीने यासंबधी वृत्त प्रसिद्ध केल्यानंतर त्याची दखल आमदार सुरेश धस यांनी घेतली आहे. आमदार सुरेश धस यांनी यासंदर्भात पोलिस प्रशासनाचे लक्ष वेधले आहे.
संबंधित चौकीत तात्काळ आवश्यक कर्मचारी नियुक्त करावेत, अशी मागणी त्यांनी जिल्ह्याच्या पोलिस अधीक्षक रितू खोकर यांना लेखी पत्राद्वारे केली आहे. दैनिक आरंभ मराठीने दिनांक १६ एप्रिलच्या अंकात ‘जिजाऊ चौक पोलीस चौकी बंदी शोभेची वास्तू’ या शीर्षकाखाली बातमी प्रसिद्ध करून या समस्येला वाचा फोडली होती.
या बातमीची दखल घेत आमदार धस यांनी पोलिस प्रशासनाला जाब विचारत चौकीतील निष्क्रियतेवर नाराजी व्यक्त केली आहे. आपल्या पत्रात आमदार धस यांनी नमूद केले आहे की, जिजाऊ चौक येथील पोलीस चौकी ही त्यांनी विधानपरिषदेचे सदस्य असताना सभागृहात प्रश्न उपस्थित करून मंजूर करून घेतली होती. परिसरात शाळा व महाविद्यालयांची संख्या मोठी असून, शाळकरी मुलींची छेडछाड तसेच तरुणांमधील भांडणे रोखण्यासाठी या चौकीचे महत्त्व मोठे आहे.
मात्र प्रत्यक्षात चौकीत कर्मचारीच नसल्याने तिचा उद्देशच फोल ठरत असल्याची खंत त्यांनी व्यक्त केली आहे. मागील वर्षी सुरू करण्यात आलेली ही पोलीस चौकी सध्या केवळ नावापुरती अस्तित्वात असल्याचे चित्र आहे.
नियुक्त चारही कर्मचारी अनेकदा अनुपस्थित राहत असल्याने नागरिकांमध्ये नाराजी वाढत आहे. त्यामुळे कायदा व सुव्यवस्थेच्या दृष्टीने ही बाब गंभीर मानली जात असून, पोलिस प्रशासनाने याकडे तातडीने लक्ष देणे गरजेचे आहे असे पत्र त्यांनी पोलिस अधीक्षक रितू खोकर यांना दिले आहे. दरम्यान, स्थानिक नागरिकांनीही या चौकीत पोलिसांनी नियमित उपस्थित राहावे अशी मागणी केली आहे.
