आरंभ मराठी | तुळजापूर
खासदार ओमराजे निंबाळकर यांच्या वाढदिवसाच्या दिवशीच तुळजापूर शहरासाठी तब्बल पाच कोटी रुपयांच्या विकासकामांना मंजुरी मिळाल्याने जिल्ह्याच्या राजकीय वर्तुळात चर्चांना उधाण आले आहे. शिवसेनेचे मुख्य नेते तथा उपमुख्यमंत्री एकनाथ शिंदे यांच्या नेतृत्वाखालील नगरविकास विभागाने आज (दि.१७) दोन स्वतंत्र शासन निर्णय जारी करून तुळजापूर शहरातील रस्ते, नाली, गटारे, पावसाच्या पाण्याचा निचरा तसेच खेळाच्या मैदानाच्या विकासासाठी एकूण पाच कोटी रुपयांचा निधी मंजूर केला आहे. हा निधी खासदार ओमराजे निंबाळकर यांच्या पाठपुराव्यामुळे मिळाल्यामुळे ओमराजे यांनी समाजमाध्यमावर एकनाथ शिंदे यांचे आभार मानले आहेत.खासदार ओमराजे निंबाळकर यांनी शिंदे यांच्याकडे निधीची मागणी करताच त्यांच्या वाढदिवशीच विकास निधीला मंजुरी मिळाल्याने या निर्णयाला विशेष राजकीय महत्त्व प्राप्त झाले आहे.
नगरविकास विभागाने जारी केलेल्या शासन निर्णयानुसार ‘राज्याने नागरी स्थानिक स्वराज्य संस्थांना द्यावयाच्या मोटार वाहन कराच्या अभिहस्तांकित रकमा रस्ता अनुदान (अनिवार्य)’ या योजनेअंतर्गत तुळजापूर नगरपरिषदेस ४ कोटी ४५ लाख रुपये मंजूर करण्यात आले आहेत. या निधीतून शहरातील विविध रस्त्यांचे मजबुतीकरण, नाल्या व गटारांची उभारणी, पावसाच्या पाण्याचा निचरा आणि इतर आवश्यक नागरी विकासकामे करण्यात येणार आहेत.
शासन निर्णयानुसार संबंधित कामांना मंजूर निधीच्या मर्यादेत तांत्रिक व प्रशासकीय मान्यता घेण्याची जबाबदारी नगरपरिषदेवर राहणार असून, या कामांची कार्यान्वयन यंत्रणा सार्वजनिक बांधकाम विभाग असेल. याशिवाय ‘नगरपरिषदांना वैशिष्ट्यपूर्ण कामासाठी विशेष अनुदान’ या योजनेअंतर्गत तुळजापूर नगरपरिषदेला ५५ लाख रुपयांचा स्वतंत्र निधी मंजूर करण्यात आला आहे. या निधीतून प्रभाग क्रमांक १० मधील सर्व्हे क्रमांक १८९ व ८३४ येथील तुळजाभवानी गृहनिर्माण संस्थेतील नगरपरिषदेचे खेळाचे मैदान विकसित करण्यात येणार आहे. दोन्ही शासन निर्णयांमुळे तुळजापूर शहराला एकूण पाच कोटी रुपयांचा विकास निधी प्राप्त झाला असून, शहरातील प्रलंबित नागरी सुविधांच्या विकासाला चालना मिळणार आहे. दरम्यान, खासदार ओमराजे निंबाळकर यांनी नुकताच एकनाथ शिंदे यांच्या शिवसेनेत प्रवेश केल्यानंतर विकासकामांच्या पाठपुराव्यात अधिक सक्रिय भूमिका घेतल्याचे चित्र दिसत आहे.
तुळजापूर शहरासाठी वाढदिवशीच मोठा निधी मंजूर झाल्याने त्यांच्या राजकीय प्रभावाची चर्चा सुरू झाली आहे. विशेष म्हणजे, तुळजापूर शहर हे आमदार राणा जगजितसिंह पाटील यांचे प्रभावक्षेत्र मानले जाते. अशा परिस्थितीत त्याच मतदारसंघात खासदार ओमराजे निंबाळकर यांनी मोठा विकास निधी मंजूर करून आणल्याने स्थानिक राजकारणात नव्या समीकरणांची चर्चा रंगू लागली आहे. सत्तेचे पाठबळ आणि विकास निधीच्या माध्यमातून ओमराजे निंबाळकर यांनी तुळजापूरमध्ये आपले राजकीय बळ वाढविण्यास सुरुवात केल्याचे बोलले जात आहे.
