आरंभ मराठी / धाराशिव
राज्याचे परिवहन मंत्री तथा धाराशिव जिल्ह्याचे पालकमंत्री प्रताप सरनाईक हे उद्या महाराष्ट्र दिनी एक दिवसाच्या धाराशिव जिल्हा दौऱ्यावर येत आहेत. महाराष्ट्र राज्याच्या ६७ व्या स्थापना दिनानिमित्त ध्वजारोहण, आरोग्य सेवा व पायाभूत सुविधांच्या उद्घाटनांसह महत्त्वाच्या आढावा बैठका या दौऱ्यात होणार आहेत.
सकाळी ७.४० वाजता शासकीय विश्रामगृह, धाराशिव येथून जिल्हाधिकारी कार्यालयाकडे ते प्रयाण करतील. ७.५० वाजता तेथे आगमन होईल. सकाळी ८.०० वाजता जिल्हाधिकारी कार्यालयाच्या प्रांगणात महाराष्ट्र दिनानिमित्त मुख्य शासकीय ध्वजारोहण समारंभ पार पडणार आहे. याचवेळी शासकीय आयुर्वेदिक महाविद्यालय व रुग्णालय, धाराशिव येथे नवीन रुग्णवाहिकेचे उद्घाटन करण्यात येणार आहे.
यानंतर सकाळी ९.०० वाजता नियोजन भवन येथे धाराशिव जिल्ह्यातील दोन प्राथमिक आरोग्य केंद्रे व चार उपकेंद्रांचे ऑनलाईन उद्घाटन तसेच तलाठी व मंडळ कार्यालयांच्या इमारतींचे ऑनलाईन भूमिपूजन होणार आहे. सकाळी ९.३० वाजता खरीप हंगामपूर्व आढावा बैठक आयोजित करण्यात आली असून, जिल्हा कृषी विभागाच्या तयारीचा आढावा घेतला जाणार आहे. त्यानंतर सकाळी १०.३० वाजता जिल्हा वार्षिक योजना सन २०२६-२७ संदर्भात महत्त्वपूर्ण बैठक होणार आहे.
दुपारी १२.०० वाजता पोलीस अधीक्षक कार्यालय येथे जिल्हा वार्षिक योजनेतून खरेदी करण्यात आलेल्या नवीन वाहनांचे अनावरण मंत्री सरनाईक यांच्या हस्ते होईल. त्यानंतर दुपारी १२.३० वाजता शासकीय वैद्यकीय महाविद्यालय, धाराशिव येथे PCR-मॉलिक्युलर लॅब व स्किल लॅबचे उद्घाटन करण्यात येणार आहे. दौऱ्याच्या पुढील टप्प्यात, शासकीय वैद्यकीय महाविद्यालयातून मोटारीने सोलापूर विमानतळाकडे प्रयाण करून तेथे आगमन व अल्पविरामानंतर सायंकाळी ६.१० वाजता त्यांचे गोव्याकडे प्रस्थान होईल.
