आरंभ मराठी / धाराशिव
एका 19 वर्षीय तरुणीला धमकावून तिचे अपहरण करून तिच्याजवळ असणारा सहा लाख रुपयांचा मुद्देमाल लुटल्याचा धक्कादायक प्रकार समोर आला आहे. नळदुर्ग परिसरात एका 19 वर्षीय तरुणीवर धमकी, मारहाण करून रोकड व सोन्याचे दागिने लुटल्याचा आणि त्यानंतर अपहरण केल्याचा धक्कादायक प्रकार घडला. या प्रकरणी नळदुर्ग पोलीस ठाण्यात दोन आरोपींविरुद्ध गंभीर स्वरूपाचा गुन्हा दाखल करण्यात आला आहे.
ही घटना दिनांक 6 मे 2026 रोजी पहाटे सुमारे 03.00 वाजता हलदरा तांडा (होर्टी) शेत परिसरात घडली. फिर्यादी स्वाती शुभम चव्हाण (वय 19, रा. हावलदरा तांडा, होर्टी, ता. तुळजापूर, जि. धाराशिव) या शेतात असताना आरोपी अभिषेक दिलीप जाधव व सोन्या जाधव (दोघे रा. लिंबाळा (दै) तांडा, ता. औसा, जि. लातूर) यांनी त्यांना गाठले. आरोपींनी फिर्यादीस तुला चाकूने भोसकून टाकू अशी धमकी देत हाताने मारहाण केली. त्यानंतर फिर्यादीकडील रोख रक्कम ₹1,30,000 व सुमारे 15 ग्रॅम वजनाचे सोन्याचे दागिने असा एकूण सुमारे ₹6,00,000 किमतीचा मुद्देमाल जबरदस्तीने काढून घेतला.
यादरम्यान आरडाओरडा होऊ नये म्हणून आरोपींनी फिर्यादीस गाडीत बसवून नेले व नंतर तिच्या मामाच्या घरासमोर सोडून दिल्याचे तक्रारीत नमूद करण्यात आले आहे. या प्रकरणी दि. 12 मे 2026 रोजी दिलेल्या प्रथम खबरेवरून नळदुर्ग पोलीस ठाण्यात भारतीय न्याय संहिता (BNS) अंतर्गत कलम 119(1), 140(3), 333, 3(5) नुसार गुन्हा दाखल करण्यात आला आहे. या घटनेचा पुढील तपास नळदुर्ग पोलीस ठाणे नळदुर्ग पोलीस करत आहे. पोलिसांकडून आरोपींचा शोध व प्रकरणाचा सखोल तपास सुरू आहे.
