आरंभ मराठी / धाराशिव
निवडणूक अनुषंगिक कामकाजात हलगर्जीपणा व टाळाटाळ केल्याचा ठपका ठेवत धाराशिव येथील श्रीमती सत्यभामा शिंदे माध्यमिक विद्यालयातील शिक्षक विष्णू तुकाराम कराड यांच्याविरुद्ध लोक प्रतिनिधित्व अधिनियम, 1951 च्या कलम 134 अन्वये आनंदनगर पोलीस ठाण्यात गुन्हा दाखल करण्यात आला आहे.
संबंधित एफआयआरची प्रत वरिष्ठ अधिकाऱ्यांकडे सादर करण्यात आली असून, याबाबतचा अहवाल मतदान केंद्रस्तरीय अधिकारी (BLO) पर्यवेक्षक तथा पंचायत समिती धाराशिवचे कनिष्ठ प्रशासन अधिकारी सोमाणी एस. बी. यांनी सादर केला आहे.
निवडणुकीच्या राष्ट्रीय कर्तव्यात हलगर्जीपणा करून निवडणूक अनुषंगिक कामकाजात अडथळा निर्माण केल्याचा आरोप कराड यांच्यावर ठेवण्यात आला आहे. यासंदर्भात 1 जुलै 2026 रोजी तहसील कार्यालयाकडून संबंधित अधिकाऱ्यांना कारवाईसाठी प्राधिकृत करण्यात आले होते.
या आदेशानुसार 3 जुलै रोजी आनंदनगर पोलीस ठाण्यात भारतीय न्याय संहिता कलम 223 (क) तसेच लोक प्रतिनिधित्व अधिनियम, 1950 च्या कलम 32(2) अंतर्गत गुन्हा नोंदविण्याचा प्रयत्न करण्यात आला.
मात्र, नमूद कलमानुसार गुन्हा नोंदविता येणार नसल्याचे पोलिसांकडून सांगण्यात आले. ही बाब तत्काळ नायब तहसीलदार (निवडणूक) यांना दूरध्वनीद्वारे कळविण्यात आली. त्यानंतर सुधारित आदेशानुसार लोक प्रतिनिधित्व अधिनियम, 1951 च्या कलम 134 अंतर्गत कारवाई करण्याचे निर्देश देण्यात आले. त्यानुसार 6 जुलै 2026 रोजी आनंदनगर पोलीस ठाण्यात शिक्षक विष्णू तुकाराम कराड यांच्याविरुद्ध अधिकृतपणे गुन्हा दाखल करण्यात आला.
गुन्हा दाखल झाल्यानंतर एफआयआरची प्रत संबंधित वरिष्ठ अधिकाऱ्यांकडे सादर करण्यात आली असून, निवडणूक कामकाजात हलगर्जीपणा करणाऱ्या अधिकाऱ्यांविरुद्ध प्रशासनाने कठोर भूमिका घेतल्याचे या कारवाईतून स्पष्ट झाले आहे.
