आरंभ मराठी / धाराशिव
फटाके बनविणाऱ्या एका कारखान्यात प्रचंड मोठा स्फोट झाल्याची घटना घडली असून, यामुळे गावचा शिवार हादरून गेला आहे. या घटनेचे नेमके कारण अद्याप समजू शकले नाही. मात्र, या स्फोटात जीवित हानी झाली नसल्याचे स्थानिकांनी सांगितले. अग्निशमन दल आणि पोलीस घटनास्थळी दाखल झाले असून, आगीवर नियंत्रण आणण्याचे प्रयत्न सुरू आहेत.
वाशी तालुक्यातील खामकरवाडी शिवारात आज सायंकाळी साडेसहा वाजण्याच्या सुमारास फटाक्याच्या कारखान्यात भीषण स्फोट झाला. बावी गावाजवळ असलेल्या ‘डिझायर फायर वर्कर्स’ या कारखान्यात ही घटना घडली. स्फोटाचा आवाज इतका तीव्र होता की संपूर्ण परिसर हादरून गेला. सुदैवाने या घटनेत कोणतीही जीवितहानी झाली नसल्याची प्राथमिक माहिती आहे.
स्थानिकांनी दिलेल्या माहितीनुसार स्फोटानंतर कारखान्यात भीषण आग लागली होती. आगीचे लोट आकाशाला भिडले होते आणि परिसरात भीतीचे वातावरण निर्माण झाले होते. स्फोटामुळे कारखान्याचे मोठ्या प्रमाणात नुकसान झाल्याचे सांगितले जात आहे.
घटनेनंतर तब्बल एक तासानंतर पोलीस घटनास्थळी पोहोचले. स्फोटात नेमकी जीवितहानी झाली आहे का, तसेच स्फोटाचे नेमके कारण काय, याबाबत अद्याप अधिकृत माहिती समोर आलेली नाही. पोलीस तपास सुरू असून परिसरात खबरदारी म्हणून उपाययोजना करण्यात येत आहेत.
