आमदार राणाजगजितसिंह पाटील यांची माहिती
प्रतिनिधी / धाराशिव
पावसाने ओढ दिल्यामुळे खरीप पिकांच्या झालेल्या नुकसानीपोटी जिल्ह्यातील ४० महसुल मंडळांना २५ टक्के अग्रीम नुकसान भरपाई देण्याचे आदेश यापुर्वीच झाले असून उर्वरीत १७ महसुल मंडळाना देखील २५ टक्के अग्रीम देण्याची अधिसुचना सोमवारी जिल्हाधिकारी यांनी जारी केली असल्याची माहिती आमदार राणा जगजितसिंह पाटील यांनी दिली आहे.
आमदार पाटील यांनी म्हटले आहे की, खरीप हंगामात पावसाने मोठा खंड दिल्याने उत्पादनात मोठी घट झाली आहे. राज्य शासनाचे अधिकारी, विमा कंपनी प्रतिनिधी व शेतकरी यांच्या संयुक्त पाहणीमध्ये ४० महसुल मंडळात ५० टक्के पेक्षा जास्त नुकसान झाल्याचे स्पष्ट झाले होते व त्यानुषंगाने जिल्हाधिकारी यांनी याबाबत अधिसुचना काढुन जिल्ह्यातील ४० महसुल मंडळाना यापुर्वीच २५ टक्के अग्रीम नुकसान भरपाई देण्याचे आदेश दिले आहेत. तर सध्याची पिक परिस्थीती लक्षात घेऊन जिल्हाधिकारी यांनी उर्वरीत १७ महसुल मंडळाची अधिसुचना काढली आहे. यामुळे आता जिल्हयातील सर्व महसुल मंडळांना २५ टक्के अग्रीम मिळण्याचा मार्ग मोकळा झाला.
खरीप पिकांची परिस्थीती अतिशय बिकट असून शेतकरी हवालदिल झाला आहे. अशा परिस्थितीत शेतकऱ्यांना आर्थिक मदत देऊन दिलासा देणे आवश्यक आहे. दोन दिवसांपुर्वीच राज्याचे उपमुख्यमंत्री देवेंद्र फडणवीस यांनी उपग्रहाच्या माध्यमातुन नुकसानीची माहिती व वास्तव परिस्थिती विचारात घेऊन विमा कंपनीला आवश्यक ते निर्देश देण्याचे सुचित केले होते. दरम्यान, महायुती सरकार सदैव शेतकऱ्यांसोबत असुन विमा कंपनीला यात कसलीही कुचराई करु देणार नाही,असेही आमदार राणा जगजितसिंह पाटील यांनी म्हटले आहे.
