धाराशिव / आरंभ मराठी
धाराशिवचे खासदार ओमराजे निंबाळकर यांनी गोवर्धनवाडी येथील निवासस्थानी परिवहन मंत्री तथा धाराशिव जिल्ह्याचे पालकमंत्री प्रताप सरनाईक यांच्या स्वागतासाठी आज स्नेहभोजनाचे आयोजन केले होते. या कार्यक्रमाला ओमराजे निंबाळकर समर्थकांसह शिवसेनेच्या कार्यकर्त्यांची मोठी गर्दी झाली होती. मात्र, पालकमंत्री प्रताप सरनाईक भोजन करून निवेदने स्वीकारत असतानाच दोन कार्यकर्त्यांमध्ये अचानक शाब्दिक चकमक उडाल्याने काही काळ वातावरणात तणाव निर्माण झाला. मिळालेल्या माहितीनुसार, बेंबळी येथील कार्यकर्ते मोईन खान आणि वरुडा येथील कार्यकर्ते सचिन शेंडगे यांच्यात काही कारणावरून वाद सुरू झाला. सुरुवातीला शाब्दिक बाचाबाची झाल्यानंतर दोघांकडून शिवीगाळही करण्यात आली. त्यामुळे उपस्थित कार्यकर्त्यांचे लक्ष या वादाकडे गेले. परिस्थिती चिघळण्यापूर्वीच काही कार्यकर्त्यांनी दोघांनाही आवर घालत वाद शांत करण्याचा प्रयत्न केला. दरम्यान, खासदार ओमराजे निंबाळकर यांचे बंधू डॉ. जयराजे यांनीही मध्यस्थी करत दोन्ही कार्यकर्त्यांना समजावून सांगितले. त्यांच्या मध्यस्थीनंतर हा वाद मिटवण्यात आला. या घटनेत नेमके कोणत्या कारणावरून वाद झाला, हे मात्र स्पष्ट झालेले नाही. विशेष म्हणजे पालकमंत्री प्रताप सरनाईक यांच्या उपस्थितीतच हा प्रकार घडल्याने कार्यक्रमस्थळी तसेच राजकीय वर्तुळात या घटनेची चर्चा रंगली आहे. खासदार ओमराजे निंबाळकर यांनी एकनाथ शिंदे यांच्या नेतृत्वाखालील शिवसेनेत प्रवेश केल्यानंतर पालकमंत्री प्रताप सरनाईक हे पहिल्यांदाच धाराशिव जिल्ह्याच्या दौऱ्यावर आले होते. या पार्श्वभूमीवर ओमराजे यांनी पालकमंत्र्यांसाठी आपल्या निवासस्थानी स्नेहभोजनाचे आयोजन केले होते. पालकमंत्र्यांच्या स्वागतासाठी मोठ्या संख्येने कार्यकर्ते उपस्थित होते.
पालकमंत्री सरनाईक यांनी भोजन केल्यानंतर उपस्थितांकडून निवेदने स्वीकारण्यास सुरुवात केली होती. त्याचवेळी बाजूला दोन कार्यकर्त्यांमध्ये वाद झाल्याने काही काळ कार्यक्रमाच्या उत्साहावर विरजण पडले. मात्र, उपस्थितांनी वेळीच हस्तक्षेप केल्याने परिस्थिती अधिक चिघळली नाही. ओमराजे निंबाळकर यांनी शिवसेनेत प्रवेश केल्यानंतर जिल्ह्यातील शिवसेनेच्या जुन्या राजकीय समीकरणांमध्ये मोठे बदल झाले आहेत. त्यांच्या पक्षप्रवेशानंतर शिवसेनेची जिल्हा कार्यकारिणी बरखास्त करण्यात आली असून, नवीन जिल्हा कार्यकारिणीची निवड अद्याप झालेली नाही. या पार्श्वभूमीवर शिवसेनेचे जुने कार्यकर्ते आणि ओमराजे निंबाळकर यांच्यासोबत नव्याने शिवसेनेत सक्रिय झालेले समर्थक यांच्यात काही प्रमाणात धुसफूस सुरू असल्याची चर्चा राजकीय वर्तुळात आहे. त्यामुळे स्नेहभोजनाच्या कार्यक्रमात झालेल्या या वादाकडेही त्याच पार्श्वभूमीवर पाहिले जात आहे. मात्र, सदर वादाचा पक्षांतर्गत मतभेदांशी थेट संबंध आहे की अन्य कोणत्या कारणामुळे वाद झाला, हे अद्याप स्पष्ट झालेले नाही.
