आरंभ मराठी / धाराशिव
अखेर तरुणांच्या रोषासमोर मोदी सरकारला माघार घ्यावी लागली असून केंद्रीय शिक्षणमंत्री धर्मेंद्र प्रधान आज दुपारी राजीनामा देत असल्याचे जाहीर केले आहे. नीट परीक्षा पेपर फुटीच्या प्रकरणावरून गेल्या एका महिन्यापासून दिल्लीत कॉक्रोच जनता पार्टीचं आंदोलन सुरू आहे. मागील काही दिवसापासून या आंदोलनाला हिंसक वळण मिळाले होते. मात्र तरीही तरुण मागे हटायला तयार नव्हते अनेकदा या तरुणांवर लाठी हल्ला करण्यात आला. या आंदोलनाचे लोण हळूहळू देशातील इतर भागात देखील पसरू लागले होते याचा. दबाव सरकारवर वाढत होता. केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी कॉक्रोच जनता पार्टीकडून करण्यात आली होती. याच मुद्यावरून पर्यावरण कार्यकर्ते सोनम वांगचुक हे देखील बेमुदत उपोषणाला बसले होते. मात्र, २३ जुलै रोजी सोनम वांगचुक यांनी त्यांचं उपोषण सोडलं. सोनम वांगचुक यांनी उपोषण सोडल्यानंतरही कॉक्रोच जनता पार्टीचं आंदोलन सुरूच राहणार असल्याची घोषणा अभिजीत दीपके यांनी केली होती. कॉक्रोच जनता पार्टीच्या आंदोलनाला देशभरातून मोठा पाठिंबा मिळत होता. शिक्षणमंत्री धर्मेंद्र प्रधान यांच्या राजीनाम्याच्या मागणीसाठी कॉक्रोच जनता पार्टी आणि विद्यार्थी ठाम होते. कॉक्रोच जनता पार्टीच्या या आंदोलनाला विरोधकांनी देखील पाठिंबा देत केंद्र सरकारवर टीकेची झोड उठवली होती. या सर्व घडामोडीनंतर केंद्रीय शिक्षणमंत्री धर्मेंद्र प्रधान यांनी अखेर आज राजीनामा दिला आहे. गेल्या एका महिन्यांपासून सुरू असलेल्या कॉक्रोच जनता पार्टीच्या आंदोलनाला अखेर मोठं यश आलं आहे. धर्मेंद्र प्रधान यांनी राजीनामा दिल्यानंतर दिल्लीतील जंतर-मंतर विद्यार्थ्यांनी मोठा जल्लोष केला. विरोधकांनी देखील या राजीनाम्याचे स्वागत केले असून सरकारला हे शहाणपण उशिरा सुचले आहे अशी टीका देखील विरोधकांकडून करण्यात येत आहे. 2014 नंतर मोदी सरकारच्या मंत्रिमंडळातील हा पहिलाच राजीनामा असून मोदी सरकारला या माध्यमातून मोठा झटका मिळाल्याचे पाहायला मिळत आहे.
