आरंभ मराठी / धाराशिव
पेपरफुटी प्रकरणामुळे रद्द करण्यात आलेली राष्ट्रीय पात्रता व प्रवेश परीक्षा (NEET-UG) आता पुन्हा घेण्यात येणार असून केंद्र सरकारने नव्या परीक्षेची तारीख जाहीर केली आहे.
सुधारित वेळापत्रकानुसार ही परीक्षा दि. २१ जून रोजी देशभरात आयोजित करण्यात येणार आहे. या निर्णयामुळे लाखो विद्यार्थ्यांना पुन्हा एकदा परीक्षेची तयारी करावी लागणार आहे. परीक्षा पारदर्शक आणि सुरळीत पार पाडण्यासाठी केंद्र सरकार व नॅशनल टेस्टिंग एजन्सी (NTA) यांनी विशेष उपाययोजना करण्यास सुरुवात केली आहे. दि. ३ मे रोजी घेण्यात आलेल्या नीट परीक्षेदरम्यान काही राज्यांत पेपरफुटी झाल्याची धक्कादायक माहिती समोर आली होती. या प्रकरणाचे धागेदोरे राजस्थान, केरळ, महाराष्ट्रासह इतर काही राज्यांपर्यंत पोहोचल्याचे तपासात स्पष्ट झाल्यानंतर केंद्र सरकारने परीक्षा रद्द करण्याचा मोठा निर्णय घेतला होता. या निर्णयामुळे देशभरातील तब्बल २३ लाख विद्यार्थ्यांना मोठा मानसिक धक्का बसला होता. वैद्यकीय शिक्षणाचे स्वप्न पाहणाऱ्या विद्यार्थ्यांमध्ये संभ्रम आणि नाराजीचे वातावरण निर्माण झाले होते. धाराशिव शहरातील पाच परीक्षा केंद्रांवर जवळपास दोन हजार विद्यार्थ्यांनी ही परीक्षा दिली होती. परीक्षा रद्द झाल्यानंतर विद्यार्थ्यांसह पालकांमध्येही चिंतेचे वातावरण होते. मात्र आता नव्या तारखेची घोषणा झाल्याने विद्यार्थ्यांना पुन्हा तयारी करावी लागणार आहे.
नॅशनल टेस्टिंग एजन्सीकडून स्पष्ट करण्यात आले आहे की, विद्यार्थ्यांना पुन्हा अर्ज भरावा लागणार नाही. यापूर्वी भरलेले अर्जच वैध राहणार असून कोणतेही अतिरिक्त परीक्षा शुल्क आकारले जाणार नाही. तसेच आधी भरलेले परीक्षा शुल्क विद्यार्थ्यांच्या खात्यात परत जमा करण्यात येणार असल्याची माहितीही देण्यात आली आहे.
दरम्यान, पेपरफुटी प्रकरणाचा तपास सध्या केंद्रीय अन्वेषण विभागाकडे (CBI) सोपविण्यात आला असून विविध राज्यांमध्ये छापेमारी आणि चौकशी सुरू आहे. या प्रकरणात काही संशयितांना ताब्यात घेण्यात आल्याची माहिती समोर येत आहे.
