आरंभ मराठी / धाराशिव
नळदुर्ग पोलिसांनी तब्बल १० कोटी ३८ लाख रुपयांच्या हशिश ऑईल तस्करीप्रकरणातील मुख्य आरोपीला ओडिशा राज्यातील अतिशय दुर्गम आणि नक्षलप्रभावित भागातून अटक करत धाडसी मोहिम यशस्वी केली आहे. स्थानिक गुन्हे शाखेच्या पथकाने अत्यंत गुप्त आणि तांत्रिक तपासाच्या आधारे ही मोठी कारवाई केली.
दिनांक १९ एप्रिल २०२६ रोजी रात्री नळदुर्ग पोलिसांनी नाकाबंदी सुरू असताना एका संशयित कारला थांबवण्याचा प्रयत्न केला होता. मात्र पोलिसांना पाहताच कारमधील आरोपींनी त्यांच्या ताब्यातील हशिश ऑईल असलेली बॅग रस्त्यावर फेकून पळ काढला. घटनास्थळी पोलिसांनी जप्त केलेल्या अमली पदार्थाची किंमत तब्बल १० कोटी ३८ लाख २० हजार रुपये इतकी असल्याचे निष्पन्न झाले.
याप्रकरणी नळदुर्ग पोलीस ठाण्यात गु.र.नं. ११४/२०२६ अन्वये NDPS कायद्यातील कलम ८(क), २०(ब), २०(ii)(C), २५ व २९ अंतर्गत गुन्हा दाखल करण्यात आला. या गुन्ह्याचा तपास पोलीस अधीक्षक श्रीमती रितु खोखर, अपर पोलीस अधीक्षक श्रीमती शफकत आमना आणि स्थानिक गुन्हे शाखेचे पोलीस निरीक्षक विनोद इज्जपवार यांच्या मार्गदर्शनाखाली सुरू होता.
तांत्रिक तपासाद्वारे पोलिसांनी या प्रकरणातील आरोपींची ओळख पटवली. यापूर्वी दोन आरोपींना नाशिक जिल्ह्यातील मालेगाव येथून अटक करण्यात आली होती. मात्र हशिश ऑईलचा मुख्य पुरवठादार आणि विक्रेता कोण, याचा शोध सुरू असतानाच तपासात ओडिशा राज्यातील प्रसेनजित ख्रिमहन दास (वय ३३) याचे नाव समोर आले. आरोपीचे केवळ नाव उपलब्ध होते. तो नेमका कुठे राहतो, कसा दिसतो याबाबत कोणतीही ठोस माहिती नव्हती.
त्यामुळे आरोपीचा शोध घेणे पोलिसांसाठी मोठे आव्हान ठरले होते. दरम्यान, दि. ६ मे २०२६ रोजी पोलीस अधीक्षकांच्या आदेशानुसार स्थानिक गुन्हे शाखेचे सहाय्यक पोलीस निरीक्षक सचिन खटके यांच्या नेतृत्वाखाली पोलीस हवालदार विनोद जानराव, नितीन जाधवर, बबन जाधवर, महेबुब अरब आणि रोहित दंडनाईक यांचे विशेष पथक ओडिशा राज्यात रवाना झाले.
तपासादरम्यान आरोपी हा ओडिशातील अतिशय दुर्गम, डोंगराळ आणि नक्षलप्रभावित भागात वास्तव्यास असल्याची माहिती पथकाला मिळाली. ही माहिती वरिष्ठ अधिकाऱ्यांना कळवून त्यांच्या विशेष सूचनांनुसार पथकाने जनतापाई (ओडिशा) या नक्षलग्रस्त भागात धाडसी कारवाई करत आरोपी प्रसेनजित ख्रिमहन दास याला ताब्यात घेतले. अटक केलेल्या आरोपीला पुढील कारवाईसाठी नळदुर्ग पोलीस ठाण्यात हजर करण्यात आले असून, या प्रकरणाचा अधिक तपास सुरू आहे.
ही उल्लेखनीय कारवाई पोलीस अधीक्षक श्रीमती रितु खोखर, अपर पोलीस अधीक्षक श्रीमती शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सपोनि सचिन खटके तसेच त्यांच्या पथकाने यशस्वीरित्या पार पाडली.
