आरंभ मराठी / धाराशिव
महाराष्ट्र दिनानिमित्त शासकीय मध्यवर्ती इमारतीसमोर आयोजित झेंडावंदन कार्यक्रमादरम्यान एक धक्कादायक घटना घडली. भूविकास बँकेच्या एका महिला कर्मचाऱ्याने स्वतःला पेटवून घेण्याचा प्रयत्न केल्याने कार्यक्रमात एकच खळबळ उडाली. मिळालेल्या माहितीनुसार, संबंधित महिला शासकीय वेतन व इतर प्रलंबित लाभ न मिळाल्यामुळे तीव्र मानसिक तणावाखाली होती.
याच संतापातून तिने झेंडावंदन सुरू असताना अंगावर ज्वलनशील पदार्थ ओतून आत्मदहनाचा प्रयत्न केला. घटनास्थळी उपस्थित असलेल्या नागरिकांनी व अधिकाऱ्यांनी तत्काळ धाव घेऊन आग विझवली आणि मोठा अनर्थ टळला. घटनेनंतर तातडीने महिलेस शासकीय वैद्यकीय महाविद्यालयाच्या रुग्णालयात दाखल करण्यात आले.
डॉक्टरांच्या माहितीनुसार, महिला सुमारे ४० ते ५० टक्के भाजली असून तिच्यावर उपचार सुरू आहेत. तिची प्रकृती चिंताजनक पण नियंत्रणात असल्याचे सांगण्यात आले.
या घटनेमुळे महाराष्ट्र दिनासारख्या महत्त्वाच्या दिवशी प्रशासनाच्या कामकाजावर प्रश्नचिन्ह उपस्थित झाले आहे. दरम्यान, या प्रकरणाची चौकशी करण्याचे आदेश देण्यात आले असून संबंधित महिलेच्या मागण्यांबाबत प्रशासनाने माहिती घेण्यास सुरुवात केली आहे.
