आरंभ मराठी / येरमाळा
महाराष्ट्रासह राज्याबाहेरही तुळजाभवानी देवीची धाकटी बहीण म्हणून प्रसिद्ध असलेल्या येरमाळा येथील श्री येडेश्वरी देवीचा चैत्र पौर्णिमा यात्रा महोत्सव येत्या २ एप्रिल ते ७ एप्रिल दरम्यान मोठ्या उत्साहात साजरा होणार आहे. यात्रेतील प्रमुख आकर्षण असलेला चुना वेचण्याचा कार्यक्रम, देवीच्या पालखीचे आमराई मंदिरात आगमन ३ एप्रिलला होणार आहे.
दरवर्षीप्रमाणे यंदाही अंदाजे १२ ते १५ लाख भाविक यात्रेस उपस्थित राहण्याची शक्यता आहे. या पार्श्वभूमीवर श्री येडेश्वरी देवस्थान ट्रस्टच्या वतीने यात्रेची तयारी अंतिम टप्प्यात पोहोचली असून, संपूर्ण परिसर भक्तिमय वातावरणाने भारावून गेला आहे.
यात्रेदरम्यान भाविकांची मोठी गर्दी लक्षात घेऊन मंदिर परिसरात व्यापक स्वच्छता मोहीम राबविण्यात आली असून यात्रा काळात ५० स्वच्छता कर्मचारी कार्यरत राहणार आहेत. पिण्याच्या पाण्याच्या व्यवस्थेसाठी मलकापूर साठवण तलावाजवळील देवस्थानच्या विहिरीतून दत्त कल्लोळ व मंदिरापर्यंत नवीन पाइपलाईनद्वारे पाणीपुरवठ्याची सोय करण्यात आली आहे. मंदिरावर आकर्षक रोषणाई, शिखराचे रंगकाम अंतिम टप्प्यात आले आहे. तसेच आमराई मंदिर परिसराची स्वच्छता व रंगकाम पूर्ण करण्यात आले आहे.
सुरक्षेच्या दृष्टीने मंदिर व आमराई मंदिर परिसरात सुमारे १०० सीसीटीव्ही कॅमेरे बसविण्यात आले असून येडेश्वरी ट्रस्टकडून १०० जवानांचा सुरक्षा ताफा तैनात करण्यात येणार आहे. भाविकांचे उन्हापासून संरक्षण व्हावे यासाठी मंदिर परिसरात मंडप उभारण्यात आले आहेत. यात्रेदरम्यान वीजपुरवठा, निवास, वाहतूक नियोजन, आरोग्य सुविधा व आपत्कालीन सेवांची सर्वतोपरी तयारी करण्यात आली आहे.
श्री येडेश्वरी देवीच्या चैत्र पौर्णिमा यात्रेनिमित्त विविध धार्मिक कार्यक्रमांचे आयोजन करण्यात येणार असून कार्यक्रम पत्रिका देवस्थान ट्रस्टकडून लवकरच प्रकाशित केली जाणार आहे.
येडेश्वरी ट्रस्टच्या पदाधिकाऱ्यांनी भाविकांनी यात्रेदरम्यान शिस्त पाळून प्रशासनाला सहकार्य करावे, असे आवाहन केले आहे.
