बँकेच्या खातेदारांना चिंता, एकामागून एक घोटाळे उघडकीस
आरंभ मराठी / धाराशिव
ग्राहकांना आकर्षक व्याजाचे आमिष दाखवून एका मल्टिस्टेट सोसायटीकडून ग्राहकांची तब्बल २६ लाखांची फसवणूक केल्याची धक्कादायक घटना उघडकीस आली आहे. राजस्थानी मल्टिस्टेट कोऑपरेटिव्ह क्रेडिट सोसायटी असे फसवणूक केलेल्या मल्टिस्टेटचे नाव असून, या सोसायटीच्या उमरगा येथील शाखेने ही फसवणूक केली आहे.
जिल्हयातील एकामागून एक बँकेत आर्थिक गैरव्यवहार समोर येत आहेत. फिर्यादी दिलीप शंकरराव सगर (वय-६२, रा. अजय नगर, उमरगा) यांना आणि त्यांच्यासोबत इतर ठेवीदारांना राजस्थानी मल्टिस्टेट बँकेने ठेवींवर आकर्षक व्याजदराचे आमिष दाखवले होते. १३ ऑक्टोबर २०२२ ते २९ जुलै २०२३ या काळात फिर्यादी दिलीप सगर आणि इतर ठेवीदारांनी आकर्षक व्याजदर मिळेल या आशेने राजस्थानी मल्टिस्टेट बँकेत २५ लाख ८६ हजार ९६८ रुपये ठेवले होते.
ठेवीदारांनी ठेवलेली रक्कम आणि त्यावरील व्याज बँकेने मुदतीत परत न करता दिलीप सगर यांच्यासह इतर ठेवीदारांची फसवणूक केली. या प्रकरणात चंदुलाल मोहनलाल, उपाध्यक्ष, बालचंद्र लोढा – सचिव, बद्रीनारायण बाहेती – सहसचिव, प्रल्हाद अग्रवाल – कोषाध्यक्ष, विजय विठ्ठलराव लठ्ठा – संचालक, अशोक जाजु, सतिष सारडा, अजय पुजारी, नामदेव रोडे, प्रेमलता बाहेती, जगदीश बियाणी – मुख्य संचालक, व्यंकटेश कुलकर्णी (सर्व रा. परळी ता.परळी जि. बीड) या सर्व संचालकांवर फसवणुकीचे गुन्हे दाखल करण्यात आले आहेत. फिर्यादी दिलीप सगर यांनी १९ ऑगस्ट रोजी दिलेल्या प्रथम खबरेवरुन उमरगा पो ठाणे येथे भा.न्या.सं. 316( 2)316(5), 318(4) 61(2) अन्वये मल्टिस्टेट बँकेच्या सर्व संचालक मंडळांवर गुन्हा दाखल केला आहे. पुढील तपास पोलीस करत आहेत.
